Ռոբերտ Քոչարյանի պաշտպաններից Հովհաննես Խուդոյանը կարծում է, որ դատավոր Արմեն Դանիելյանի անակնկալ որոշման նպատակը` առանց Ռոբերտ Քոչարյանի պաշտպանների առարկությունները լսելու խորհրդակցական սենյակ հեռանալ, արդարադատության իրականացնելուց խուսափելն է: Այդ մասին, այսօր ասաց պաշտպանը`դատարանում, լրագրողների հետ զրույցում:
Հովհաննես Խուդոյանը չի կիսում դատավորի եւ դատախազության այն դիրքորոշումը, որ պաշտպանական կողմը միտում ունեի` ձգձգելու բողոքի քննությունը: Պաշտպանը հավաստիացնում է, որ իրենց ներկայացրած միջնորդությունը`քննությունը կասեցնել եւ գործը ՍԴ ուղարկել, միտված էր դատական ստուգման տևողությունը կրճատելուն։
«Դրա արդյունքում ոչ թե 7-8 ժամ առարկություն կներկայացնեինք, այլ 2 ժամում կավարտեինք մեր դիրքորոշումները: Նաեւ, եթե դատարանը համարում էր, որ առկա է իրավունքի չարաշահման փաստ, ուներ ողջ գործիքակազմը, ընդհուպ մինչեւ պաշտպանների նկատմամբ դատական սանկցիա կիրառել: Այդ պատճառաբանությունն ընդամենը արդարադատության իրականացումից խուսափելու պատրվակ էր»,- հայտարարեց պաշտպանը`հավելելով, որ հայտնի չէ, թե այս գործը միջդատական վարույթի կարգով է քննվելու, թե՞ դատական քննության կարգով, քանի որ`ոչ այն փուլում ենք գտնվում, ոչ մյուս. «Բողոքների քննության սկզբից ընդամենը դատարանից ակնկալում էինք, որ տա այդ հարցի պատասխանը, սակայն ողջ քննության ընթացքում դատարանն այդպես էլ չտվեց հարցի պատասխանը: Դատարանը մի կողմին լսել է, իսկ մյուս կողմին՝ ոչ. սա խայտառակություն է մեր դատական համակարգի համար»:
Պաշտպանի կարծիքով, Ռոբերտ Քոչարյանը նույնպես իր առարկությունները կներկայացներ:
Կարդացեք նաև
Լրագրողները հետաքրքրվեցին` հնարավո՞ր է դատավորին կարգապահական պատասխանատվության ենթարկելու հարցով դիմեն ԲԴԽ: Պաշտպանն ասաց, որ խնդիր կա, քանի որ ԲԴԽ–ն ամբողջական կազմով չի գործում։
Նելլի ԳՐԻԳՈՐՅԱՆ
