ԱԺ-ն այսօր քննարկում է «Հաշմանդամների սոցիալական պաշտպանության մասին» օրենքում փոփոխություններ կատարելու մասին օրինագիծը, համաձայն որի՝ ուսումնառության ընթացքում երրորդ կարգի հաշմանդամություն ձեռքբերածները եւս հնարավորություն կունենան պետպատվերով՝ անվճար սովորել: Սրբուհի Գրիգորյանը նշեց, որ օրենսդրական բացի արդյունքում այս արտոնությունից օգտվում են միայն մանկուց հաշմանդամություն ունեցած, ինչպես նաեւ՝ ուսումնառության ընթացքում առաջին կամ երկրորդ կարգի հաշմանդամություն ձեռքբերածները:
Ի դեպ, նախագծի քննարկման ժամանակ «Իմ քայլի» պատգամավոր Գայանե Աբրահամյանը Սրբուհի Գրիգորյանին կոչ արեց «հաշմանդամ» բառի փոխարեն «հաշմանդամություն ունեցող» արտահայտությունը կիրառել, նույն խմբակցության պատգամավոր Վահագն Թեւոսյանն էլ նկատեց, որ ճիշտ մշակույթ ձեւավորելու համար լեզվամտածողությունից է պետք սկսել: Սրբուհի Գրիգորյանը գործընկերների նկատառման հետ համաձայնեց՝ պարզաբանելով, որ ինքն օրենքի անվանում էր ընթերցում, իսկ խոսքում օգտագործում էր «հաշմանդամություն ունեցող» արտահայտությունը: Սրբուհի Գրիգորյանը շեշտեց՝ Գայանե Աբրահամյանի նկատառումը գուցե լավ առիթ հանդիսանա՝ օրենքի անվանման փոփոխությունը նախաձեռնելու համար: Հավելենք, որ օրինագիծը դեռ պետք է քվեարկվի:
Լուիզա ՍՈՒՔԻԱՍՅԱՆ
