«Ճիշտն ասած՝ կարծում էի, որ այդ զանգը, հակառակը, խոսում է օբյեկտիվ որոշման մասին: Ես ծանոթների միջոցով կամ ինչ-որ կապերով չեմ փորձել առաջադրվել որպես ԲԴԽ թեկնածու»,-ԱԺ ամբիոնից այսօր հայտարարեց ՀՀ Բարձրագույն դատական խորհրդի անդամի թեկնածու, իրավաբան Գրիգոր Բեքմեզյանը՝ անդրադառնալով ԼՀԿ պատգամավոր Արման Բաբաջանյանի այն քննադատությանը, որ «Իմ քայլը» զանգել է Բեքմեզյանին եւ նրան առաջարկել առաջադրվել, հետեւաբար՝ նա կախված է այդ քաղաքական ուժից:
«Զանգելիս վստահ են եղել, որ եթե ես համաձայնվեմ, իրենցից կախված չեմ լինելու: Իմ էությունը բացառում է որեւէ կախվածություն: Վլադիմիր Վարդանյանն իմ կենսագրությունը ներկայացնելիս հպարտորեն կամ քննադատաբար նշեց, որ ամուսնացած չեմ: Անգամ զոքանչ չունեմ, որից կարող էի կախված լինել»,-կատակեց Գրիգոր Բեքմեզյանը:
Ապա, դիմելով պատգամավորներին, ասաց. «Հասկանո՞ւմ եք, ես ազատ մարդ եմ, եւ իմ ազատությունն ապահովում է իմ սկզբունքայնությունը: Միակ բանը, որից կախվածություն ունեմ, երկրիս հանդեպ սերն է»:
Հիշեցնենք, որ ԱԺ-ն այսօր քննարկում էր Գրիգոր Բեքմեզյանի թեկնածության հարցը: Նրան ԲԴԽ անդամի պաշտոնում առաջադրել է «Իմ քայլը» խմբակցությունը: Քվեարկությունն այսօր է:
Կարդացեք նաև
Լուիզա ՍՈՒՔԻԱՍՅԱՆ
