Հայաստանյան բանկերից մեկի հայցերի հիման վրա դատարաններում քննվող գործերի քանակը, ըստ Datalex.am դատական տեղեկատվական համակարգի, մինչ այս պահը եղել է 53811, իսկ մեկ ուրիշ բանկի դեպքում՝ մոտ 80.000: Այս մասին այսօր ԱԺ ամբիոնից հայտարարեց ՀՀ Բարձրագույն դատական խորհրդի անդամի թեկնածու, իրավաբան Գրիգոր Բեքմեզյանը: Նա բանկերի անունները չբարձրաձայնեց, ասաց, որ միայն 2019թ.-ին հայցերի քննությունների թիվը գերազանցել է 1000-ը:
«Դատարանների վրա դրված այսպիսի գործերի քանակը պետք է նվազեցնել: Պատկերացնո՞ւմ եք, թե դատարանների վրա ինչպիսի ծանրաբեռնվախություն է դրված բանկերի գործերի առումով: Բանկերի գործունեության թերացումների հետեւանքով է, որ այդքան գործեր են հասնում դատարաններին»,-համոզմունք հայտնեց Գրիգոր Բեքմեզյանը:
Հիշեցնենք, որ ԱԺ-ն այսօր քննարկում է Գրիգոր Բեքմեզյանի թեկնածության հարցը: Նրա թեկնածությունը ԲԴԽ անդամի պաշտոնում առաջադրել է «Իմ քայլը» խմբակցությունը:
Լուիզա ՍՈՒՔԻԱՍՅԱՆ
