Ազգային ժողովն այսօր քննարկում է ՀԱՊԿ անդամ երկրների՝ տեղեկատվական անվտանգության ոլորտում մարտահրավերների հակազդման միասնական համակարգի ձեւավորման վերաբերյալ համաձայնագիրը վավերացնելու հարցը:
Համաձայնագրի զեկուցողն ԱԱԾ ղեկավար Արթուր Վանեցյանն է: Նա տեղեկացրեց, որ համաձայնագիրը միտված է կիբերանվտանգությանը, տեղեկատվական անվտանգության ոլորտում տեղեկությունների փոխանակմանը եւ մարտահրավերների հաղթահարմանը:
Պատգամավորների մի մասը հարցադրումներով մտահոգություն հայտնեց՝ իսկ եթե Ադրբեջանը փորձի միջամտե՞լ, կամ՝ փորձի ՀԱՊԿ անդամ գործընկերոջ միջոցով արտահոսքի ենթարկված տեղեկություններ ստանա ՀՀ-ի մասին:
Վանեցյանը նշեց. «Ադրբեջանի ազդեցություն կամ տեղեկատվական արտահոսքի հնարավորություն չի լինելու, քանի որ համաձայնագիրը վերաբերելու է միայն ՀԱՊԿ երկրների տեղեկատվական անվտանգության ապահովմանը, ոչ թե անդամ-երկրի ներքին կյանքին: Այն առանձին համակարգ է լինելու՝ միայն ՀԱՊԿ-ի շրջանակում տեղեկատվության փոխանցման համար: Այս համակարգը չի կապակցվելու ՀՀ որեւէ ներքին համակարգի: Սա ամրագրված է համաձայնագրի պայմանագրով: Չի լինելու տեղեկատվության այնպիսի արտահոսք, որը կվնասի ՀՀ անվտանգությանը»:
Կարդացեք նաև
Վանեցյանը հավելեց, որ առկա է ՀՀ Սահմանադրական դատարանի եզրակացությունը, համաձայն որի՝ համաձայնագրով ստանձնվելիք պարտավորությունները չեն հակասելու ՀՀ Սահմանադրությանը:
Լուիզա ՍՈՒՔԻԱՍՅԱՆ
