«Առաջարկում եմ կոնկրետ ասել, ոչ թե օդի մեջ խոսել վատ կադրային քաղաքականության մասին»,-ԱԺ ամբիոնից այսօր անդրադառնալով «Լուսավոր Հայաստան» խմբակցության ղեկավար Էդմոն Մարուքյանի քննադատությանը, թե կառավարության կադրային քաղաքականությունը վատն է, ասաց ԱԺ նախագահ Արարատ Միրզոյանը:
Նա որպես օրինակ մատնացույց արեց դահլիճում նստած Էկոնոմիկայի նախարար Տիգրան Խաչատրյանին. «Վատ կադր է՞: Մի հատ նայեք նրա կենսագրությունը: Պարոն Ջանջուղազյանը…հեչ պրոֆեսիոնալ չի՞»:
Ապա մատնացույց անելով մյուս նախարարներին՝ Արարատ Միրզոյանը կատակեց. «Հակոբ Արշակյան՝ հեչ կապ չունի իր ոլորտի հետ: Արայիկ Հարությունյան, Արսեն Թորոսյան…պատահական մարդիկ ո՞նց եկան ոլորտներ ղեկավարելու»:
Ապա ԱԺ նախագահն անդրադարձավ Արդարադատության նորանշանակ եւ երիտասարդ նախարար Ռուստամ Բադասյանին. «Դեռ մի ասուլիս չի տվել, բայց ասում եք, թե վատ կադրային քաղաքականություն ենք անում: Դե կտեսնեք, որ նրանից լավ Արդարադատության նախարար չի եղել»:
Կարդացեք նաև
Արարատ Միրզոյանը հեգնեց. «Այնպիսի «վատ» կադրային քաղաքականություն է, որ որեւէ նախարար 250 անուն անշարժ գույք չունի, որեւէ մեկի երեխայի հաշվին տասը միլիոն դրամ չկա: Մի տարի է պաշտոնավարում եք, մի տասը միլիոնի եղածն ի՞նչ էր, որ չկա»:
Լուիզա ՍՈՒՔԻԱՍՅԱՆ
