Ադրբեջանի պաշտպանության նախարար Զաքիր Հասանովը հունիսի 18-ի մամուլի ասուլիսում հայտարարություններ է արել հայ հանրահայտ ֆուտբոլիստ Հենրիխ Մխիթարյանի եւ հայերի մասին առհասարակ, ինչը զավեշտալի մեկնաբանությունների առիթ է տվել տեղացի լրագրողների շրջանում: Այս մասին Aravot.am-ի հետ զրույցում ասաց «Իմ քայլը» խմբակցության պատգամավոր Հովհաննես Իգիթյանը: Նրա փոխանցմամբ՝ Հասանովի ասածները Մխիթարյանի մասին կարելի է այսպես թարգմանել՝ «ո՞վ է Հենրիխ Մխիթարյանը, մի դրամ փող չարժե, նա նստած է պահեստայինների նստարանին: Գար՝ խաղար, թե ոչ, միեւնույնն է՝ նրա թիմը պարտվելու էր»:
Իգիթյանը նկատեց. «Լրագրողներից մեկը Հասանովին հիշեցրել է, թե որքան գումարով է «Արսենալը» ձեռք բերել այդ «մի դրամ չարժեցող» ֆուտբոլիստին»:
Հովհաննես Իգիթյանի գնահատմամբ՝ այս խնդիրը Հենրիխ Մխիթարյանի անձի մասին չէ, այլ այն փաստի, որ հայազգի ֆուտբոլիստի հայ եւ օտարերկրացի ֆուտբոլասերների մի մասը չկարողացավ մուտք գործել Ադրբեջան, մի մասն էլ խնդիրներ ունեցավ Ադրբեջանում, ինչը ցույց է տալիս Ադրբեջանի ռասիստական մոտեցումը: «Ադրբեջանը չափն անցավ, նա մինչ օրս պատասխան չի տվել այս իրավիճակի համար, մինչդեռ իրեն եվրոպական չափանիշներով առաջնորդվող երկիր է հռչակում»,-նկատեց պատգամավորը:
Կարդացեք նաև
Զաքիր Հասանովի ճեպազրույցի այլ մանրամասները՝ տպագիր «Առավոտ»-ի վաղվա համարում:
Լուիզա ՍՈՒՔԻԱՍՅԱՆ
