Դիմորդների շուրջ 20 %-ը այս տարի հայոց լեզու և գրականություն առարկայի միասնական քննությունից «կտրվել» է` չհաղթահարելով անցողիկ 8 միավորի շեմը։ Ստացվում է` յուրաքանչյուր հինգերորդը տապալվել է։
ԵՊՀ Հայ բանասիրության ֆակուլտետի դեկան Արծրուն Ավագյանը պատասխանելով Aravot.am-ի հարցին, թե իր կարծիքով հայերենն ինչու է այսքան նահանջել, ասաց, որ ինքը ընդունելության քննությունների հետ առնչություն չունի, դրա համար չի կարող մեկնաբանություն անել: Ավելի ուշ ավելացրեց. «Հայերենն ամեն տեղ էլ նահանջում է, այս ժողովրդին հայերեն պետք չէ, անգլերեն, ռուսերեն ու այլ լեզուներ են պետք»:
ԵՊՀ Հայ բանասիրության ֆակուլտետի Ժամանակակից հայոց լեզվի ամբիոնի դոցենտ, բանասիրական գիտությունների թեկնածու Նարինե Ներսիսյանի ձեւակերպմամբ. «Հայերենի նահանջը պայմանավորված է նրանով, որ տարիներ շարունակ երեխաներին վարժեցրել են չմտածելուն, անգիրի մեխանիզմին: Այս տարվա ընդունելության թեստերի մեջ առանձնապես մեծ փոփոխություն չկար, ընդամենը տեղերն էին փոխված, գրականությունից այլ հարցեր էին ավելացված: Ու քանի որ երեխան վարժված էր չմտածելու եւ անգիրի, հարցերին պատասխանել է սխալ, մինչդեռ առաջադրանքներն այնպիսին պետք է լինեն, որ երեխան մտածի, ինքնուրույն վերլուծի»:
Նարինե Ներսիսյանը մի օրինակ էլ բերեց. «Եթե գրականության հարցերն այնպիսին են, որ ստեղծագործությունը պետք է աճման կարգով դասավորել, դա ի՞նչ է տալիս ցանկացած մարդու, որ դիմորդին ինչ տա»:
Կարդացեք նաև
Գոհար ՀԱԿՈԲՅԱՆ
Բոլորը քննադատում են տեստային համակարգը ու ոչ մեկը քաջություն չունի հայտարարելու, որ սովետական կրթական սիստեմն էր ամենաէֆեկտիվը, որը միտումնավոր քանդվեց։ Բոլոնյան սիստեմը լավագույն ձևն է մտածել չիմացող ամբոխ արտադրելու համար։ Ինքս ասպիրանտուրան ԵՊՀ-ում անցնում եմ նույն Բոլոնյան սիստեմով՝ կրեդիտային համակարգով։ Ավելի տխմար բան դժվար է պատկերացնել։ Հանձնել եմ մոտ 4-5 առարկայից ստուգարք և այդ առարկաներից ոչ մեկին այդպես էլ լիարժեք չտիրապետեցի ու չհասկացա, դրանք մեր ինչին էին պետք։ Ասպիրանտու՛րայում։ Զավեշտը այն է, որ երբ մեզ տրամադրեցին ՀՀ-ում Բոլոնյան սիստեմի ներդրման փորձի վերաբերյալ ՀՀ համալսարանների ստատիստիկ տվյալները, ես հասկացա, որ ՀՀ բոլոր ԲՈՒՀերը՝ իրենց դասախոսներով և ուսանողներով մինչև հիմա չգիտեն, ինչ անել այդ կրեդիտ կոչվածի հետ և այն ցույց է տալիս նվազագույն էֆեկտիվություն ՀՀ բոլոր անխտիր ԲՈՒՀերում։ Դպրոցներում չգիտեմ ինչ սիստեմով են կրթում, բայց եթե դպրոցի դասատուն կրեդիտային համակարգով համալսարանն ավարտած մեկն է, ապա չեմ զարմանում ուսման որակի ցածր ցուցանիշներից։