«Ես շատ խորհրդանշական եմ համարում նախորդ դատական նիստին պաշտպանական կողմի, հատկապես մեղադրյալի հայտարարություններն, այսպես կոչված, հորդորներն ուղղված դատավորին, որ յուրաքանչյուրն իր կատարած արարքի համար պատասխան է տալու: Ես շատ խորհրդանշական եմ համարում, որ այդպիսի արտահայտություն անում է այսօր մեղադրյալ, իսկ մեղսագրված հանցանքների պահին՝ հանրապետության նախագահ հանդիսացած անձը»,-այսօր Քոչարյանի գործով դատական նիստի ընդմիջմանը լրագրողների հետ զրույցում ասաց գլխավոր դատախազ Արթուր Դավթյանը:
Նրա կարծիքով, պաշտպանական կողմի մարտավարությունն է՝ դատարանում, ասուլիսներ հրավիրելով բարոյահոգեբանական ճնշումներ են գործադրում. «Բայց այդ արտահայտությունը՝ յուրաքանչյուրը պատասխան է տալու, իրենք մոռացել են, որ դա վերաբերում է հանցանք կամ իրավախախտում կատարելու դեպքում պատասխան տալուն: Իսկ որեւէ պաշտոնյա, որ բարեխղճորեն իր պարտքն է կատարել՝ անհանգստանալու խնդիր չունի: Մենք հույս ունենք, որ դատավորը այդ բարոյական եւ հոգեբանական ճնշումներին չի ենթարկվի՝ վստահ լինելով, որ ՀՀ-ում դատավորը պաշտպանված է»:
Դավթյանն ասաց, որ պաշտպանական կողմի՝ նիստերն արհեստական ձգձգելու միտում են տեսնում:
Նշենք, որ այսօր Ռոբերտ Քոչարյանի պաշտպան Հովհաննես Խուդոյանը դատավոր Արմեն Դանիելյանին ինքնաբացարկի միջնորդություն ներկայացրեց. Այս պահին դատավորը խորհրդակցական սենյակում է, որոշումը կհրապարակի այսօր ժամը 12:30-ին:
Կարդացեք նաև
Դատախազի խոսքերով՝ նախորդ նիստն ուղղակի հարցուպատասխանի էր վերածվել:
Մանրամասները՝ տեսանյութում
Նելլի ԲԱԲԱՅԱՆ
