ՀՀ ԱԳ նախարարի բացման խոսքը Հայաստան-Եվրոպայի խորհուրդ 2019-2022թթ. գործողությունների ծրագրի պաշտոնական մեկնարկի արարողությանը
Մեծապես ուրախ եմ ազդարարել Հայաստան – Եվրոպայի խորհուրդ քառամյա գործողությունների ծրագրի մեկնարկը։ Սա մեր համագործակցության կարևոր գործիք է: Արդեն իսկ լավ ավանդույթ է դարձել, որ գործողությունների ծրագրի մեկնարկը տրվում է Գլխավոր քարտուղարի տեղակալ Տիկին Բատաինի-Դրագոնիի ներկայությամբ և մասնակցությամբ։ Երրորդ անգամ է, որ Դուք այստեղ եք ծրագրի մեկնարկը ազդարարելու համար։ Եվ անձամբ եմ հիշում, երբ միասին տվեցինք նախորդ ծրագրի մեկնարկը 2012 թվականին։
Մեր գործողությունների ծրագրի դրական գնահատականն այն է, որ այն եղել և մնում է կարևոր գործիք Հայաստանում քրեական արդարադատության, քրեակատարողական հիմնարկների, տեղական ժողովրդավարության, կոռուպցիայի, բարձրագույն կրթության և մի շարք այլ ոլորտներում իրականացվող բարեփոխումների խթանման համար: Այս տարի մեր առաքելությունն ավելի լայն է: Այս տարվա բյուջեն շատ ավելի հավակնոտ է. այն կազմում է 18,9 միլիոն եվրո և ունի հատուկ կենտրոնացում այն ոլորտներում կատարվող բարեփոխումների վրա, որոնք մեր կառավարության գերակայություններն են: Եվս մեկ անգամ ցանկանում եմ նշել, որ մենք ունենք շատ լավ արձագանք գործողությունների ծրագիրը ֆինանսավորող դոնոր համայնքից: Մեր հաշվարկների համաձայն՝ այս պահի դրությամբ ապահովվել է 2019-2022թթ. գործողությունների ծրագրի բյուջեի մոտ 57 տոկոսի երաշխավորումը: Եվ դա գերազանց արդյունք է:
Ցանկանում եմ շնորհակալություն հայտնել բոլոր այն երկրներին, ովքեր իրենց ամուր աջակցությունն են հայտնել Հայաստան-Եվրոպայի խորհուրդ Գործողությունների ծրագրին: Ինչպես ասացի, սա բարեփոխումների գործիք է: Դրանք մեր բարեփոխումներն են. դրանք Եվրոպայի Խորհրդի բարեփոխումները չեն, դրանք դոնորական համայնքի բարեփոխումներ չեն: Սա այն է, ինչի կարիքը Հայաստանն ունի: Եվ սա այն է, ինչ Հայաստանը ցույց տվեց, առ այն, որ բացարձակապես լուրջ է այն հարցում, թե ինչ երկիր ենք ցանկանում կառուցել: Երկիր, որը նախագծված է եվրոպական չափանիշների համաձայն, երկիր, որը խորապես հիմնված է ժողովրդավարության, մարդու իրավունքների և իրավունքի գերակայության ընդհանուր արժեքների վրա: Սա այն երկիրն է, որը մեր հասարակությունն է ցանկանում ունենալ: Եվ դրա դրսևորման ականատեսը եղանք 2018թ. ապրիլ-մայիս ամիսներին՝ Թավշյա հեղափոխության ընթացքում: Այն արտացոլում է մեր ժողովրդի ցանկությունները և մեր կառավարության վճռականությունն ու հանձնառությունը: Ուստի, ես լիովին վստահ եմ, որ մենք գործնականորեն հնարավորություն ունենք մեր կարիքներին համահունչ օգտագործելու այս կարևոր Գործողությունների ծրագիրը, բարեփոխումների կարևոր այս գործիքը: Եվ երբ 2022թ. ամփոփելիս լինենք, ասենք, որ արձանագրել ենք շոշափելի արդյունքներ, որ բարեփոխումների այս գործընթացում ունենք անհրաժեշտ հանրային վստահություն:
Կարդացեք նաև
Ցանկանում եմ առանձնահատուկ ընդգծել բարեփոխման մեկ կարևոր ոլորտ, որն առնչվում է արդարադատությանը, իրապես անկախ, անկողմնակալ դատական համակարգին Հայաստանում։ Անդրադառնալով այս թեմային՝ նշեմ, որ կառավարության կողմից իր լիազորությունները ստանձնելուց հետո հստակ ընդգծվեց, որ կառավարությունը կանի ամեն ինչ՝ անկախությունը և անկողմնակալությունն ապահովելու համար, կանի ամեն ինչ՝ բացառելու դատական համակարգի վրա որևէ ճնշում: Եվ, մեղմ ասած, կառավարությունը չի հանդուրժի արդարադատության վրա որևէ ճնշումը, , և դա պատճառ դարձավ երեք-ժամյա քաղաքական ակցիայի համար։ Բայց առավել կարևոր է, որ այն ընդգծեց առանց հապաղելու բարեփոխումների առաջմղման վճռականությունը։ Ցանկանում եմ հատուկ շնորհակալություն հայտնել Եվրոպայի խորհրդի գլխավոր քարտուղար պարոն Յագլանդին, նրա արագ արձագանքի համար։ Նա հեռախոսազրույց ունեցավ Հայաստանի վարչապետի հետ և ասաց․ «Մենք այդտեղ ենք և ցանկանում ենք օգնել»։ Սա է մեր համագործակցության բնույթը, սա է Եվրոպայի խորհրդին մեր անդամակցության էությունը: Մեկ շաբաթվա ընթացքում ընդունել ենք փորձագետների, բարձր մակարդակի փորձագետների՝ լավ բարեկամ պարոն Քրիստոս Ջակումոպուլոսի գլխավորությամբ, ովքեր սկսեցին աշխատել բարեփոխումների բովանդակության և արդարադատության ոլորտում բարեփոխումների ֆինանսավորման վրա։ Հունիսի 12-ին, գլխավոր քարտուղարը պատասխան նամակ գրեց վարչապետ Փաշինյանին, որում վերահաստատեց բոլոր պայմանավորվածությունները, և այժմ մենք սկսել են աշխատանքները։
Ներկայումս Հայաստան-Եվրոպայի խորհուրդ գործողությունների ծրագրում կատարում ենք բոլոր անհրաժեշտ կարգավորումները, որպեսզի հնարավոր լինի առանց որևէ հապաղման առաջ շարժվել բարեփոխումների հարցում ։ Ցանկանում էի ընդգծել այս հստակ դրույթը՝ այս համագործակցության արժեքավոր նշանակությունը, Եվրոպայի խորհրդում մեր անդամության նպատակը ցույց տալու համար։
Ցանկանում եմ նորից շնորհակալություն հայտնել Ձեզ արագ արձագանքի համար։ Դատական բարեփոխումների, իրապես անկախ և անկողմնակալ դատական բարեփոխումների իրականացումը մեզ համար ամբողջական է դարձնում հեղափոխության փիլիսոփայությունը։ Այժմ մենք այդ փուլում ենք գտնվում։
Իմ մյուս կարևոր դրույթը վերաբերում է Եվրոպայի խորհրդի 70-ամյակին: Սա մեզ համար շատ կարևոր ընտանիք է, ազգերի ընտանիք, որոնք կանգնած են կողք կողքի ընդհանուր արժեքների համատեքստում: Սա համաեվրոպական կառույց է: Սա կառույց է, որին մենք անդամակցում ենք 2001թ.-ից և տեսել ենք այդ անդամակցության օգուտները ինչպես լավ, այնպես էլ՝ վատ ժամանակներում: Եվ այսօր մենք մեր գործընկերների հետ միասին տոնում ենք Եվրոպայի խորհրդի 70-ամյակը: Ցանկանում եմ նաև առանձնահատուկ ընդգծել Եվրամիության և ԵԽ անդամ երկրների հետ մեր համագործակցության կարևորությունը, որոնք եղել են բարեփոխումներին ուղղված մեր փոխգործակցության եռանդուն աջակիցները՝ ներառյալ Եվրոպայի խորհրդի շրջանակներում: Ինչպես գիտեք, նոր եմ վերադարձել անցյալ շաբաթ Բրյուսելում կայացած Հայաստան-Եվրամիություն գործընկերության խորհրդի երկրորդ նիստից: Բրյուսելում ինձ հետ գտնվող գործընկերներից ոմանք այժմ այստեղ են: Եվ Եվրամիության հետ մեր համագործակցության շրջանակում կրկին Եվրոպայի խորհրդի հզոր փորձագիտական աջակցությունն է ցուցաբերվել Հայաստանում իրականացվող բարեփոխումներին : Մենք շարունակական երկխոսություն ենք վարում և´ Եվրոպայի խորհրդի, և´ Եվրոպական միության անդամ երկրների հետ մեր երկկողմ հարաբերությունների շրջանակներում, և այս առումով ևս մեկ անգամ ցանկանում եմ ընդգծել Հայաստանի խորը գնահատանքը:
Այսօր մեկ այլ կարևոր առաքելություն ունենք կատարելու. մենք մարելու ենք Եվրոպայի խորհրդի 70-ամյակին նվիրված հոբելյանական փոստային բացիկ, որը թողարկվել է «ՀայՓոստ»-ի կողմից և արտահայտում է կազմակերպության և այս կարևոր հոբելյանի նկատմամբ մեր գնահատականը:
Ցանկանում եմ խոսքս եզրափակել մեկ այլ դրույթով: Եվրոպայի խորհուրդն արտացոլում է մեր իրավունքները, մեր ազատությունները, մեր Եվրոպան: Եվրոպայի խորհուրդը 47 անդամ պետություններն են, և մենք միասին ապրում ենք մի ժամանակաշրջանում, երբ մեր արժեքներն առերեսվում են բազմաթիվ մարտահրավերների Եվրոպայի տարբեր հատվածներում: Կարծում եմ, սա իրապես շատ ուժեղ կոչ է՝ հավաստիացնելու, որ մենք վերահաստատում ենք մեր հանձնառությունն այն ամենին, ինչն անվանում ենք ընդհանուր արժեքներ: Մեր աշխատանքը պայմանավորված է Եվրոպայի խորհրդի հզորությամբ, որը հանդիսանում է մեր համատեղ աշխատանքի հենակետը ինչպես կազմակերպությունն ամրապնդելու, այնպես էլ՝ Եվրոպայի առջև ծառացած մարտահրավերներին հակազդելու ուղղությամբ՝ հանուն համընդհանուր արժեքների երաշխավորման։ : Քանի որ խոսքը մեր իրավունքների , մեր ազատությունների, մեր Եվրոպայի խորհրդի մասին է:
ԱԳՆ հաղորդագրություն
