Այսօր Երեւանի ավագանին արտահերթ նիստ էր հրավիրել՝ քննարկելու քաղաքապետարանի հաստիքակազմի ավելացման հարցը: Նախագիծը հարուցեց Երեւանի ավագանու «Լույս» դաշինքի անդամ Դավիթ Խաժակյանի դժգոհությունը: Դավիթ Խաժակյանի խոսքով, հաստիքացուցակը նույնն է՝ ավելացրած ՓԲԸ-ների փոփոխությունը, աղբահանության վճարման-գանձման փոփոխությունը:
«Երեւի արդեն նշանակություն չունի հիմնավորել, որ ուռճացված հաստիքացուցակ է, նույն բանն է, ինչ նախկինում՝ չհաշված, որ թվաքանակի առումով մեկնարկային փուլում 1998-ը դարձել է 2132: Հիմա նույն նախագիծն է՝ հանած աշխատանքային խումբը: Ես հասկանում եմ, որ կողմ պետք է քվեարկեք, եւ անցնի այս նախագիծը, բայց օպտիմալացումը կառավարությունում գնում է մի ուղղության վրա, այստեղ մի այլ ուղղության վրա, եւ մենք, փաստորեն, այն հաստիքացուցակը, ինչ-որ ունեինք նախկինում, համարում ենք օպտիմալ»,- ասաց Դավիթ Խաժակյանը՝ նշելով, որ փաստորեն, մի մեղադրանք է միայն մնում նախկիններին՝ կոռումպացված էին. «Քաղաքապետի 7 խորհրդական էիք առաջարկում, մենք ասում ենք՝ թող ունենա 4-ը , 4 օգնական եք առաջարկում, ասում ենք՝ 2 օգնականը բավարար է: Մեր տրանսպորտի վարչությունն ունի 9 աշխատակից, 19.5 աշխատակից եք բերել տեղեկատվության եւ հասարակության հետ կապերի վարչություն: Սա ադեկվա՞տ է մեր քաղաքի համար, ես ասում եմ՝ ոչ»:
Ըստ Դավիթ Խաժակյանի, իշխող ուժը ծանրաբեռնվածության հանգամանքն է առաջ քաշում, բայց այն վարչությունում՝ ճարտարապետական բլոկում, որն ամենածանրաբեռնվածներից մեկն է, ոչ մի հաստիք չի ավելացել:
Երեւանի քաղաքապետ Հայկ Մարությանը հակադարձեց. «Այստեղ հնչեց միտք՝ դե, հենա կառավարում էին լավ էլ: Լավ է, որ գոնե ասացիք կոռուպցիա կար, թե չէ պատկերացումներս լրիվ կփոխվեր: Լավ է, որ այդ մի հարցում բոլորս միակարծիք ենք»:
Կարդացեք նաև
Քաղաքապետն ասաց, որ որքան էլ պետք են այդ նոր հաստիքները, բայց իրենք «մի կերպ, ճռռալով» աշխատում են, որ չշատացնենք. «Այդ վարչության պետերը գալիս զեկուցում են՝ չենք կարող, մեզ մարդ է պետք, ես ասում եմ՝ տղերք, դիմացեք, մենք չենք ուզում այս պահին այս մասով ավելացնել հաստիքները, բայց այո, կարող է մի պահ գալ, որ էլի ավելացնենք: Օպտիմալացում չի նշանակում միայն կրճատում, որ մի վարչությունում կբարձրանա, մյուսում կկրճատվի:
Այս պահին այս հաստիքացուցակը, որ կա, մեծ դժվարությամբ մարսում է այն դիմումների քանակը, որոնք գալիս են, որովհետեւ իրականում մշակվում են այդ դիմումները: Ես ցավում եմ, որ դուք այդ ամեն ինչը համեմատում եք: Դուք չեք տեսնում այն փաստը, որ չկա որեւէ դիմում, որը օրենքից դուրս է մշակվում, կամ ինչ-որ նորմերի խախտմամբ է մշակվում կամ ինչ-որ անուն ազգանունով պայմանավորված է մշակվում»:
Լուսինե ԲՈՒԴԱՂՅԱՆ
