Բուժիչ հատկություններով օժտված դարչինը վաղուց ի վեր լայնորեն օգտագործվում է թե՛ որպես համեմունք, թե՛ որպես դեղամիջոց։
Այն ստանում են Cinnamomum verum ծառի արմատից։ Հին Եգիպտոսում դարչինը համարվում էր փարավոններին վայել ընծա, մեր օրերում էլ այն չի կորցրել իր արժեքավորությունը ու շարունակում է հմայել մարդկանց իր յուրօրինակ համով ու բույրով։
Դարչինը հարուստ է օրգանիզմին անհրաժեշտ տարբեր սննդանյութերով և օգնում է առողջության հետ կապված ամենատարբեր խնդիրների ժամանակ։ Այն օժտված է հակաբակտերիալ ու հակաբորբոքային ազդեցությամբ, արդյունավետ է նաև արտաքին օգտագործման համար նախատեսված միջոցների բաղադրակազմում։
Մենք առանձնացրել ենք 8 պատճառ, թե ինչու արժե դարչինը ներառել ամենօրյա սննդակարգում
Կարդացեք նաև
1․ Դարչինը լավացնում է մարսողությունը
Դարչինը պարունակում է ֆլավոնոիդներ (մասնավորապես ցինամալդեհիդ), որոնք իրենց հակաբորբոքային ազդեցության շնորհիվ բարելավում են մարսողությունը։ Այն նաև օժտված է հակասպազմատիկ և փքահալած ազդեցությամբ, ուստի նվազեցնում է այնպիսի տհաճ երևույթները, ինչպիսիք են ցավը, բորբոքումը, փքվածությունը։ Դարչինը նաև բջջանյութ և կալցիում է պարունակում, որոնք նպաստում են ուղիղ աղիքի կանոնավոր աշխատանքին, օրգանիզմից կենսագործունեության տարբեր արգասիքների դուրսբերմանը։
2․ Պաշտպանում է սիրտն ու անոթները
Դարչինի կանոնավոր ու չափավոր օգտագործումը բարենպաստ է անդրադառնում սրտի և անոթների վրա։ Այս համեմունքը հարուստ է անհրաժեշտ ճարպաթթուներով և հակաօքսիդանտներով, նպաստում է խոլեսթերինի մակարդակի նվազեցմանն ու կանխում զարկերակային բարձր ճնշման առաջացումը։
Իսկ հակաբորբոքային ազդեցությամբ օժտված բաղադրամասերը մասնակցում են անոթների հյուսվածքների վերականգնման գործընթացներին՝ այդպիսով նվազեցնելով ինֆարկտի վտանգը։
3․ Օգնում է ազատվել ավելորդ քաշից
Դարչինում առկա ցինամալդեհիդը խթանում է նյութափոխանակությունն ու ակտիվացնում ճարպերի այրումը։
Դարչինի թուրմը նպաստում է արյան մաքրմանն ու օգնում օրգանիզմին օգտագործել ածխաջրերն ու շաքարը որպես էներգիայի աղբյուր։
Բայց դա դեռ ամենը չէ։ Դարչինի բաղադրամաս կազմող բջջանյութի շնորհիվ հագեցածության զգացում է առաջանում, իսկ դա օգնում է խուսափել սննդի ընդունման միջակայքերում «համեղ պատառների» ճաշակումից, այդպիսով էլ՝ ավելորդ կիլոգրամներից։
4. Պայքարում է շաքարային դիաբետի դեմ
Համեմունքը պարունակում է ցինամտանին В1, որն օրգանիզմում խթանում է ինսուլինի ռեցեպտորները՝ կանխելով դրանց ապաակտիվացումը, ինչի շնորհիվ դրանք աշխատում են օպտիմալ ռեժիմով․ օրգանիզմն օգտագործում է գլյուկոզան և շաքարը չի կուտակվում արյան մեջ։ Այսպիսով այն նպաստում է այդ հիվանդության կանխարգելմանը։ Իսկ եթե, այնուամենայնիվ, հիվանդությունը գլուխ է բարձրացրել, դարչինն օգնում է վերահսկել շաքարի մակարդակը։
5․ Բարելավում է շնչառական համակարգի վիճակը
Դարչինի հակաբակտերիալ ու հակաբորբոքային նյութերը պաշտպանում են շնչառական համակարգը ախտածին բակտերիաներից։
Դարչինով թեյն օգնում է հարբուխի կամ հազի ժամանակ՝ նվազեցնելով լորձն ու հյուսվածքների բորբոքումը։
6․ Խթանում է ուղեղի աշխատանքը
Հետազոտությունների արդյունքները ցույց են տալիս, որ դարչինի չափավոր օգտագործումը խթանում է գլխուղեղի աշխատանքը, կանխում դրա վաղաժամ ծերացումը։ Լավանում է հիշողությունն ու ուշադրությունը, սրանում տեղեկատվության ընկալունակությունը։
7․ Թեթեւացնում է դաշտանային ցավերը
Դարչինն օժտված է հակասպազմատիկ ու ցավազրկող ազդեցությամբ, նպաստում է լարված մկանների թուլացմանն ու թեթևացնում ցավը։ Նաև ունի միզամուղ հատկություն, ինչը նույնպես կարևոր է։
8․ Պայքարում է բերանի տհաճ հոտի դեմ
Դարչինն իր հակաբակտերիալ ազդեցությամբ մաքրում է բերանի խոռոչը, կանխում մանրէային ու սնկային վարակները։ Բացի այդ դարչինը նպաստում է լյարդի մաքրմանը, ինչի շնորհիվ օրգանիզմն ավելի հեշտությամբ է ազատվում տոքսիններից ու կենսագործունեության արգասիքներից։ Ինչն էլ իր հերթին նպաստում է բերանի տհաճ հոտից ազատմանը։
Ծանուցում․ նյութն ունի ընդհանուր տեղեկատվական բնույթ ու չի հետապնդում բուժում նշանակելու նպատակ։
Պատրաստեց Մարինե ԱԼԵՔՍԱՆՅԱՆԸ
