«Դա բնական է, բայց ՀՀ-ում եւ Արցախում այդ հռչակագրերի չեղարկումից առանձնապես չպետք է վհատվեն, որովհետեւ մեր ազգային նպատակը չէ առանձին քաղաքների հետ եղբայրական հարաբերություններ հաստատելը, այլ այն, որ Արցախը ստանա միջազգային ճանաչում»,-Aravot.am-ի հետ զրույցում անդրադառնալով Արցախի եւ Ֆրանսիայի չորս քաղաքների միջեւ Ֆրանսիայի դատական ատյանի որոշմամբ բարեկամության հռչակագրերի չեղարկմանը, ասաց Ադրբեջանի հարցերով փորձագետ Գրիգորի Այվազյանը: Նրա բնորոշմամբ՝ նշյալ հռչակագրերի չեղարկման փաստը զարմանալի չէ. «Միաժամանակ՝ դա հետաքրքիր ֆոնի վրա է ծավալվում՝ հաշվի առնելով Ադրբեջանի վերջին շրջանի հատկապես կոշտ հռետորաբանությունը եւ սահմանային լարվածությունը»:
Մեր զրուցակիցն ընդգծեց, որ Ֆրանսիան չի ճանաչում Արցախի անկախությունը, ուստի իրավական տեսանկյունից նման քայլերը կարող են լինել ոչ միայն Ֆրանսիայում. «Սա կարող է նախադեպ լինել այլ երկրների քաղաքների համար: Ուստի զգոն լինենք եւ ի ցույց չդնենք ՀՀ-ի եւ Արցախի իշխող վերնախավերի ոչ հարթ հարաբերությունները: Դրանք կարելի է պարզել փակ դռների հետեւում՝ առանց հակառակորդին առիթավորվելու հնարավորություն տալու»:
Գրիգորի Այվազյանի խոսքով՝ բարեկամության հռչակագրերի չեղարկումը, ի տարբերություն այլ հարցերի, չնչին խնդիր է. «Ավելի վատ բաներ են տեսնում, երբ ԵԱՀԿ Մինսկի խմբի համանախագահները լեգիտիմացնում են «Արցախի ադրբեջանական համայնքին»՝ վերջինիս ղեկավարի հետ հանդիպելով: Մեր ակտիվ գործողություններով պետք է չեզոքացնենք նման իրադարձությունները՝ առաջ քաշելով Արցախյան հակամարտության լուծման հայկական օրակարգը: Մենք վաղուց պետք է հասնեինք Արցախի ճանաչմանը՝ գոնե մի քանի երկրի կողմից»: Գրիգորի Այվազյանը շեշտեց, որ ադրբեջանական դիվանագիտությունը տարիներ շարունակ աշխատում է ողջ աշխարհում՝ իր ազգային շահին հասնելու համար. «Ադրբեջանական լոբբին ամենուր է ազդում, այդ թվում՝ Ֆրանսիայում: Ժամանակին Ադրբեջանում սարսափում էին հայկական սփյուռք հասկացությունից, իսկ հիմա հակառակն է»:
Կարդացեք նաև
Լուիզա ՍՈՒՔԻԱՍՅԱՆ
