«Ես ինձ վատ եմ զգում այն հանգամանքից, որ իմ նշանակած դատավորի նկատմամբ նման բացասական վերաբերմունք կա»,- այսօր ՀՀ վերաքննիչ դատարանում ընթացող նիստի ժամանակ հայտարարեց ՀՀ երկրորդ նախագահ Ռոբերտ Քոչարյանը`դիմելով դատավոր Արմեն Դանիելյանին:
Հիշեցնենք, ՀՀ վերաքննիչ քրեական դատարանում այսօր շարունակվում էր «մարտի 1-ի գործով» տուժողների իրավահաջորդի ներկայացուցիչ Վահե Գրիգորյանի եւ տուժողի իրավահաջորդի ներկայացրած Սեդա Սաֆարյանի ներկայացրած վերաքննիչ բողոքի քննությունը: ՀՀ գլխավոր դատախազությունը բողոքարկել է մայիսի 18-ի՝ Երեւան քաղաքի ընդհանուր իրավասության դատարանի՝ ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումը փոփոխելու եւ նույն դատարանի մայիսի 20-ի՝ քրեական գործի վարույթը կասեցնելու եւ Սահմանադրական դատարան դիմելու որոշումը: Վերաքննիչ բողոքներ են ներկայացրել նաեւ տուժողների իրավահաջորդների ներկայացուցիչ Վահե Գրիգորյանը և տուժողի ներկայացուցիչ Սեդա Սաֆարյանը:
Դատավորն այսօր արդեն մերժել էր Ռոբերտ Քոչարյանի պաշտպանների`իր ինքաբացարկի միջնորդությունը: Ավելի ուշ, դատավորին ինքաբացարկի դիմում ներկայացրեց մեղադրող կողմը:
«Ձեր յախան թափ տվեք այս գործից, սրանից լավ հոտ չի գալիս: Իրոք, լավ հոտ չի գալիս: Այս քրեական գործն ամբողջությամբ կարված գործ է եւ մարդիկ այս գործը կարելու համար պատասխանատվության են ենթարկվելու շատ խիստ»,- հայտարարեց Ռոբերտ Քոչարյանը` հավելելով, որ վատ է զգում, որ իր նշանակած դատավորի նկատմամբ այս տարիների ընթացքում այսպիսի վերաբերմունք է ձեւավորվել:
Կարդացեք նաև
Մինչ այդ Ռոբերտ Քոչարյանի պաշտպաններից Ռուբեն Սահակյանն էլ դատավորին դիմելով ասել էր. «Ձեզ չենք վստահում ինչպես մենք, այնպես էլ մեղադրող կողմը»:
Ռոբերտ Քոչարյանը հայտարարեց, որ միանում է Սեդա Սաֆարյանի միջնորդությանը, նաեւ հավելեց, որ ներկայացված հիմնավորումների նկարագրական մասի հետ համաձայն չէ, քանի որ դրանք ամբողջությամբ չեն համապատասխանում իրականությանը: Խոսքը «մարտի 1»- գործերի`Սեդա Սաֆարյանի ներկայացրած փաստերն էին:
Այսպիսով, դատավարության մասնակից բոլոր կողմերը միացան դատավորի ինքաբացարկի միջնորդությանը:
Նելլի ԳՐԻԳՈՐՅԱՆ
