Ինչպես արդեն տեղեկացրել ենք, ՀՀ վերաքննիչ դատարանում այսօր շարունակվում է ՀՀ երկրորդ նախագահ Ռոբերտ Քոչարյանի եւ մյուսների գործով դատական նիստը: Քննվում են Վահե Գրիգորյանի եւ Սեդա Սաֆարյանի բողոքները`Ռոբերտ Քոչարյանի խափանման միջոցը փոխելու դեմ: Նախորդ նիստում Ռոբերտ Քոչարյանի պաշտպանները դատավորին բացարկի միջնորդություն էին ներկայացրել:
Երեւանի դատախազ Գեւորգ Բաղդասարյանն այսօր նիստի ժամանակ հարց ուղղեց նախագահող դատավոր Արմեն Դանիելյանին` ի՞նչ նպատակով է Ռոբերտ Քոչարյանը դատարան մուտք գործում ոչ թե գլխավոր մուտքով, այլ հետնամուտքով: Գեւորգ Բաղդասարյանը կարծում է, որ դա կարող է կասկածների տեղիք տալ` դատարանի հետ շփումների առումով: Նիստը նախագահող դատավորը հայտարարեց` շփումները բացառած են: Դատավորը նաեւ ասաց, որ դատարանը նման կարգ չի սահմանել, նման կարգադրություն եւ հանձնարարություն էլ ինքը չի տվել: Թե ինչո՞ւ է այդպես` խոստացավ ճշտել եւ ասել:
Դատախազի հայտարարությանը Ռոբերտ Քոչարյանի պաշտպան Արամ Օրբելյանն արձագանքեց: Նա ասաց, որ իր պաշտպանյալի` այլ մուտքից ներս մտնելը պայմանավորված է նրա կարգավիճակով՝ պաշտոնաթող նախագահ լինելու հանգամանքով: Պաշտպանը հավելեց նաեւ, որ Ռոբերտ Քոչարյանը ետնամուտքով է դատարան մտնում`նաեւ անվտանգության նկատառումներից ելնելով: Նրան ուղեկցում են անվտանգության աշխատակիցները:
Նելլի ԳՐԻԳՈՐՅԱՆ
