Պատասխանելով Արամ Աբրահամյանի հարցին, թե տպավորություն կա, որ Հայաստանի եւ Արցախի ղեկավարության միջեւ հակասությունները ծագել են այն բանից հետո, երբ Բակո Սահակյանը եկել եւ միջնորդել էր Ռոբերտ Քոչարյանի համար՝ ՀՀ վարչապետ Նիկոլ Փաշինյանը «Շանթ» հեռուստաընկերությանը տված բացառիկ հարցազրույցում ասաց. «Ի՞նչ հակասությունների մասին է խոսքը: Այն, ինչ կա, դրա մասին խոսվել է հրապարակային: Կարող են տարբեր խնդիրներ լինել, որոնց վերաբերյալ մենք կարող ենք նույն տեսակետը չունենալ՝ նաեւ ձեր նշած հարցի վերաբերյալ…
Ես ասել եմ, բարոյական առումով կարող է լինել հասկանալի, բայց քաղաքական առումով պետք է ճիշտ գնահատենք՝ ինչքանով է ճիշտ, որ գործող նախագահը կոնկրետ ազդեցություն է ունենում դատարանի վրա: Այսինքն, գործող նախագահը, որն ունի նաեւ ուժային լծակներ, ով ունի հատուկ ծառայություններ եւ այդպես շարունակ, այսպիսի ուղղակի միջամտություն է ունենում դատական գործընթացին: Որքանո՞վ է սա ընդունելի:
Ես նկատի ունեմ, որ դատական գործընթացում, ըստ էության, դատավորը ամենաբարձր կարգավիճակ ունեցող մարդն է եւ այդպես պետք է լինի: Եվ պատկերացրեք՝ դատական պրոցես է տեղի ունենում եւ դատական նիստերի դահլիճում ներկա է շատ ավելի բարձր կարգավիճակ ունեցող մարդ ու այդ բարձր կարգավիճակ ունեցող մարդը դատավորին ասում է՝ միջնորդում եմ, որպեսզի դուք կայացնեք այսպիսի որոշում: Ինչքանո՞վ կարող ենք այս պայմաններում խոսել օբյեկտիվ դատավարության հնարավորության մասին»:
Աշոտ ՀԱԿՈԲՅԱՆ
