«Այն բանակցությունների փաթեթը, որը ես, այսպես ասած, ժառանգություն եմ ստացել, ես ինքս եմ փոխանցել Արցախի իշխանություններին՝ իմանալով, որ դրանք նրանք չունեն: Սրանով ամեն ինչ ասված է: Բայց ասել՝ տեղյակ են պահել, տեղյակ չեն պահել… տեղյակ պահելու տարբեր ձեւեր կան: Ըստ էության հանրությունն էլ է տեղյակ պահվել, որովհետեւ, այդ հանդիպումները թաքուն չեն եղել: Այսինքն, բոլորն իմացնել են, որ տեղի են ունեցել հանդիպումներ Հայաստանի եւ Ադրբեջանի ներկայացուցիչների միջեւ: Տեղյակ պահելու տարբեր մակարդակներ կան:
Սովորաբար տրենդը եղել է այնպիսին, որ Արցախի բանակցային գործընթացը տեղի էր ունենում գաղտնիության պայմաններում: Ես կարծում եմ, որ գաղտնիությունը բառի ընդհանրական իմաստով տեղին չէ, որովհետեւ սա համազգային հարց է եւ հնարավորին շատ մարդ պետք է տեղեկացված լինի, հնարավորին շատ նյուանսների մասին:
Իսկ, ընդհանուր առմամբ, ես շարունակում եմ պնդել, որ Արցախի հարցի վերջնական լուծողը ժողովուրդն է: Իշխանությունները, կառավարությունը կարող է տարբերակներ առաջարկել, եթե պարզվի, որ բանակցային սեղանի շուրջ ձեւավորվել է շատ թե քիչ ընդունելի մոդել: Բայց այդ մոդելի վերաբերյալ վերջնական որոշումը պետք է կայացնի ժողովուրդը: Ընդ որում՝ ուզենք թե չուզենք, ասենք թե չասենք: Եթե որեւէ մեկը մտածում է, թե հնարավոր է Ղարաբաղի հարցի լուծման որեւէ տարբերակ կիրառել, որը ժողովրդի համար ընդունելի չէ, դա ուղղակի պարզ միամտություն է»,- «Շանթ» հեռուստաընկերությանը տված բացառիկ հարցազրույցում խոսելով Ղարաբաղյան հարցի կարգավորման մասին ասաց ՀՀ վարչապետ Նիկոլ Փաշինյանը:
Աշոտ ՀԱԿՈԲՅԱՆ
