Պաշտպանության նախարար Դավիթ Տոնոյանն այսօր ԱԺ-ում լրագրողների հետ կարճատեւ ճեպազրույց ունեցավ: Aravot.am-ի հարցին՝ սահմանի ողջ երկայնքով հակառակորդի անօդաչու թռչող սարքերի պտտվելը ինչո՞վ եք բացատրում, հնարավո՞ր է նոր դիվերսիոն ներթափանցման փորձ լինի՝ նախարարը պատասխանեց. «Մերն էլ է թռնում ամբողջ երկայնքով»:
Հարցին, թե սահմանի հետ կապված ի՞նչ տեղեկություններ կան, լարվածություն կա՞՝ նախարարը պատասխանեց. «Երեկվա եւ այսօրվա զեկույցներով կայուն վիճակ է»:
Նախարարը չցանկացավ թուրք-ադրբեջանական զորավարժության հետ կապված մեկնաբանություն տալ. «Չեմ մեկնաբանի, որովհետեւ մենք հիմա այս փուլում վերլուծում ենք»:
Հարցին՝ պատերազմի սպառնալիք կա՞, որովհետեւ ամեն նման լարվածությունից հետո նման խոսակցություններ են լինում՝ Տոնոյանը պատասխանեց. «Եթե պատերազմի սպառնալիք անմիջական լինի, ես ձեզ կտեղեկացնեմ»:
Կարդացեք նաև
Մենք հարցրեցինք՝ իսկ հատուկջոկատայինների կուտակման հետ կապված ի՞նչ կասեք՝ նախարարը պատասխանեց. «Հատուկջոկատայինների կուտակում նաեւ կա մեր կողմից»: Տոնոյանը վստահեցրեց, որ պետք չի մտահոգվել:
Հռիփսիմե ՋԵԲԵՋՅԱՆ
