«Պատմության դասագրքերում փոփոխություններ կատարելու առումով արդեն աշխատանքներ տարվել են, հիմա էլ արվում են: Ստեղծվել է հանձնաժողով, որը քննարկում է պատմության դասագրքերում առկա խնդիրները»,-լրագրողների հետ զրույցում այսօր անդրադառնալով ԳԱԱ Պատմության ինստիտուտի դիմաց պատմության դասագրքերի բովանդակությունից բողոքողների ցույցին, ասաց Կրթության, գիտության, մշակույթի եւ սպորտի նախարար Արայիկ Հարությունյանը: Նրա խոսքով՝ բողոքողների առաջադրած բոլոր հարցերը նախարարությունը կարող է քննարկել նաեւ այդ հանձնաժողովի շրջանակում. «Օրինակ, պատմության մեկ դասագրքի վերաբերյալ մոտ 500 դիտողություն ունենք: Հիմա դրանք տպագրվելուն ընդառաջ՝ քննարկվում են: Գործընթացը ժամանակատար է»:
Ինչ վերաբերում է 2008թ.-ի Մարտի 1-ի իրադարձությունների վերաբերյալ պատմության դասագրքերում խնդրահարույց տեղեկություններին, Արայիկ Հարությունյանը նշեց. «Հանձնաժողովը պետք է վերջնական եզրակացություն տա: Մենք որեւէ կերպ չենք միջամտում՝ ունենալով սեփական քաղաքական անցյալով պայմանավորված կարծիք: Որպեսզի ազդեցություն չլինի, հարցն ամբողջությամբ վերապահել ենք մասնագետներին, որպեսզի տան եզրակացություններ, եւ փոփոխությունները տեղի ունենան»: Հարցին՝ «իշխանափոխության մասին պատմության դասագրքերում կգրվի՞», Արայիկ Հարությունյանը պատասխանեց. «Չգիտեմ երբ, բայց ինչ-որ փուլում պետք է գրվի, որովհետեւ դա մեր պատմության մի մասն է»:
Լուիզա ՍՈՒՔԻԱՍՅԱՆ
