«Պետք է հասկանալ՝ ի՞նչ էր մեկ տարի առաջ Հայաստանում տեղի ունեցածը, հեղափոխությո՞ւն, իշխանափոխությո՞ւն: Եթե հեղափոխություն, ապա արդյոք դա լիբերալ դեմոկրատական հեղափոխություն էր, թե բուրժուադեմոկրատական հեղափոխություն էր, թե՝ ժողովրդական հեղափոխություն էր, թե, դա ընդհանրապես հեղափոխություն չէր»,-այսօր Հայ-ռուսական համալսարանում, որտեղ տեղի ունեցավ Եգոր Գայդարի «Կայսրության կործանումը» գրքի շնորհանդեսը ասաց ՀՀ վարչապետ Արմեն Դարբինյանը: Պարոն Դարբինյանն ասաց, որ ժամանակը ցույց կտա, թե դա ինչ էր:
Կարեւոր համարելով «Կայսրության կործանումը» գրքի թարգմանությունը,պարոն Դարբինյանն ասաց, որ այն մեզ խորհելու տեղիք պետք է տա: Գրքում մատնանշվում են այն խնդիրները,որոնց բախվում են բազմազգ պետությունների ավտորիտար վարչակարգերը, որոնց տնտեսությունը զգալիորեն կախված է լինում վառելիքաէներգետիկ ռեսուրսների գների տատանումներից: Այս խնդիրն արդիական է այսօրվա Ռուսաստանում եւ հեղինակը բացատրում է, թե Խորհրդային Միության թույլ տված որ սխալներից պետք է խուսափել:
Կարդացեք նաև
Գրքի մասնագիտական խմբագիր ՀՀ նախկին վարչապետ Հրանտ Բագրատյանը, որը նույնպես ներկա էր միջոցառմանը, ասաց, որ այս գիրքը 90-ականների հեղափոխության մասին է: Պարոն Բագրատյանը ինչպես ռուսներին, այնպես էլ հայերին խորհուրդ տվեց խնդիրները փնտրել իրենց մեջ եւ դրանք չպայմանավորել արտաքին գործոններով:
Հրանտ Բագրատյանի խոսքով, Ռուսաստանում ստացվում է այնպես, որ 60-80 տարին մեկ անգամ հեղափոխություն է տեղի ունենում. «Այնտեղ, որտեղ կա հեղափոխություն,նշանակում է կա հասարակությանը կազմակերպելու լուրջ թերություններ: Լավ հասարակությունը չի գնում հեղափոխության ճանապարհով»:
ՀՀ-ում տեղի ունեցած հեղափոխությունն էլ, ըստ պարոն Բագրատյանի, նույնպես ունի իր խնդիրները, քանի որ մինչեւ հիմա չենք կարողանում փոխել տնտեսական կուրսը:
Լուսինե ԲՈՒԴԱՂՅԱՆ
