Այսօր ԱԺ-ում, երբ հանձնաժողովների համատեղ նիստում քննարկվում էր 2018-ի պետբյուջեի կատարման հաշվետվությունը, ԲՀԿ պատգամավոր Սերգեյ Բագրատյանը Կոտայքի մարզպետ Ռոմանոս Պետրոսյանին հարցրեց՝ «Դուք հայտարարում եք մամուլով, տարածում եք, որ Աբովյանի քաղաքապետարանում բազմաթիվ հանցագործություններ եք բացահայտել եւ հետամուտ եք լինելու, որպեսզի այդ հանցագործությունները մինչեւ վերջ բացահայտվեն եւ պատժվեն: Դուք գիտեք, որ գոյություն ունի անմեղության կանխավարկած: Եթե ձեր որեւէ հայտարարությունից որեւէ մեկը դեռեւս դատարանով չի ճանաչվել մեղավոր կամ անմեղ, դուք, լինելով բարձրաստիճան պաշտոնյա, ձեզ ինչպե՞ս եք թույլ տալիս հայտարարել մի բան, որը դեռ դատարանով ապացուցված չի»:
Մարզպետը պատասխանեց. «Ես չեմ ասել հանցագործություն եմ բացահայտել, ես ասել եմ՝ իրավական եւ մասնագիտական հսկողության արդյունքում ի հայտ եկած մի շարք առերեւույթ իրավախախտումների վերաբերյալ հաղորդում եմ ներկայացրել մարզի դատախազին, հարուցվել է քրեական գործ: Սա՝ մեկ: Հողային աճուրդի փաստերի վերաբերյալ ամբողջ փաթեթն ուղարկվել է իրավապահ մարմիններին եւ հարուցվել է քրեական գործ՝ երկու: Իմ հաղորդման վրա երկու քրգործ է հարուցված, ես հարգում եմ անմեղության կանխավարկած ինստիտուտը եւ սպասում ենք իրավապահների իրավակարգավորումների արդյունքում վեր հանված այդ փաստերի հավուր պատշաճի քննմանը եւ հետագա գնահատականին»:
Հռիփսիմե ՋԵԲԵՋՅԱՆ
