«Ըստ հայտարարվածի` հակահարձակողական էին, ըստ բնույթի` հարձակողական»,- այսպես է բնութագրում հունիսի 7-11-ը Նախիջեւանում անցկացված թուրք-ադրբեջանական` «Անսասան եղբայրություն 2019» զորավարժությունները «Օրբելի» կենտրոնի փորձագետ, ադրբեջանագետ Տարոն Հովհաննիսյանը: Այսօր «Զարկերակ» մամուլի ակումբում լրագրողների հետ հանդիպման ժամանակ փորձագետն ասաց, որ նման մեծ մասշտաբի թուրք-ադրբեջանական զորավարժություններ տեղի են ունեցել նաեւ 2017 թվականին, դարձյալ Նախիջեւանում:
Հիշեցնենք, որ այդ զորավարժությունների ընթացքին հետեւել են Թուրքիայի եւ Ադրբեջանի պաշտպանության նախարարները: Փորձագետի դիտարկմամբ, այդ զորավարժություններում Ադրբեջանը եւ Թուրքիան ներգրավվել էին իրենց սպառազինություններում առկա գրեթե ողջ զինտեխնիկան` նաեւ տանկեր, ինքնաթիռներ եւ այլն:
Այդ ընթացքում Արցախի սահմանին իրավիճակի լարումը, ինչի արդյունքում թե ադրբեջանական, թե հայկական կողմը մարտական կորուստներ ունեցան, փորձագետը հավաստիացնում է, որ զորավարժության հետ կապ չունի: Ասում է`ընդհանուր իրավիճակի հետ է կապված:
Իր գնահատմամբ, վերջին տարիներին, Թուրքիան` Ադրբեջանի միջոցով, փորձում է իր դիրքերն ամրապնդել տարածաշրջանում, ինչը հարվածում է ՌԴ-ի շահերին: «Ռուսական կողմն այստեղ անհանգստանալու տեղ ունի»,- ասում է փորձագետը`հավելելով, որ հայկական կողմն էլ միշտ պետք է իր զինված ուժերի մարտունակությունը բարձրացնի:
Կարդացեք նաև
Հիշեցնենք, երեկ ՀՀ-ում ՌԴ դեսպանատան ռազմական կցորդը հայտարարել էր, որ զորավարժությունները նախօրոք հայտարարված էին եւ ընթացել են ըստ սցենարի ու ոչ մի արտառոց բան տեղի չի ունեցել:
Aravot.am-ի հարցին պատասխանելով` փորձագետը վստահեցրեց, որ քիչ հավանական, գրեթե անհավանական է, որ Նախիջեւանի հատվածում Թուրքիան եւ Ադրբեջանը համատեղ գործողություններ ծավալեն Հայաստանի դեմ: Ըստ նրա, այդ հատվածում միայն լարվածությունը կարող է աճել, ինչպես ակնհայտ է դառնում վերջին երեք-չորս տարիներին:
Այլ մանրամասները` տեսանյութում
Մեր դիտարկմանը` համահո՞ւնչ են հայկական կողմից հնչեղ խաղաղության քարոզները եւ Ադրբեջանի` ուժի նման ցուցադրությունները, Տարոն Հովհաննիսյանն այսպես արձագանքեց. «Երբ մենք խոսում ենք մեր կողմից խաղաղության կոչերի մասին, չափազանցում ենք»:
Նա հիշեցնում է, որ խաղաղության քարոզը բանակցային գործընթացում համարվել է կարեւոր թելերից մեկը, որը հիմնական խնդրի քննարկման համար հարթակ կլինի: Նաեւ նկատում է, որ սկզբնական շրջանում հայկական կողմը ակտիվ փորձում էր հետեւել փարիզյան այդ պայմանավորվածությանը, մինչեւ Ադրբեջանի կողմից ատելության քարոզի բացահայտ հայտարարումները: «Մարտից ՀՀ պաշտպանության նախարարը ավելի հստակ խոսեց, հետո նաեւ ՀՀ վարչապետը խոսեց այն մասին, որ պայմանավորվածության միակողմանի պահպանում չի լինելու»,- ասաց բանախոսը` հիշեցնելով նաեւ Արցախի սահմանում լարվածության վերջին շրջանում տարբեր գերատեսչություններից հնչած հայտարարությունները եւ քայլերը. «Եթե սա խաղաղության կոչ է, ես դրան դեմ չեմ: Հայկական կողմը միշտ պատրաստ է խաղաղության, բայց ադրբեջանական կողմն է խախտում պայմանավորվածությունները: Սա է՝ ինչ տեսնում ենք վերջին կես տարում»:
Ինչ վերաբերվում է պատերազմի վերսկսման հավանականությանը, փորձագետի կարծիքով, դա միշտ էլ կա, բայց կանխագուշակումներ չի ցանկանում անել, քանզի պատերազմի վերսկսումը կախված է մի շարք գործոններից:
Նելլի ԳՐԻԳՈՐՅԱՆ
