Ջրային կոմիտեի նախագահ Վարդան Մելքոնյանին այսօր 2018-ի պետբյուջեի կատարման հաշվետվության քննարկման ժամանակ ԲՀԿ պատգամավոր Սերգեյ Բագրատյանը հարցրեց ոռոգման ջրի խնդիրներից, գյուղերում այս պահին այդ խնդիրը սուր է: Մելքոնյանը պատասխանեց, որ իրենց եւ միջազգային կազմակերպությունների փորձագետները ուսումնասիրում են եւ պետք է կտրուկ լուծում տան, թե ինչ անեն ջրօգտագործող ընկերությունների հետ, ինչ պետք է լինի իրենց կարգավիճակը. «Փաստ է՝ չի ստացվում: Անընդհատ սուբսիդավորում ենք, իրենք անընդհատ ինչ-որ ծախսեր են անում, գումարները ծախսում են՝ սպասարկման որակը չի բավարարում ոչ մեկին…Ամենացածր սպասարկման որակն է ստացվում: Պետք է ունենանք ինչ-որ ռացիոնալ լուծում այս հարցի: Այսպես շարունակվել չի կարող, դա անընդունելի է»:
Մելքոնյանն ասաց, որ այս պահին ոռոգման սեզոն է, այն ձախողել չեն կարող, դրա համար կտրուկ քայլեր չեն անում. «Միակ քայլը վերահսկելն է շատ խիստ՝ թե՛ ջրաքանակների, թե՛ գանձումների հետ կապված, թե՛ շահագործման, վերանորոգման առումով, որ ավելորդ գումարների վատնում չլինի»:
Վարդան Մելքոնյանը նախկիններին մեղադրեց. «Դա գալիս է նախկիններից: Այդ ջրաքանակները, որ հաշվում են, շատ դեպքերում գալիս է օդից, առաստաղից: Չի հիմնավորվում դա: Մենք շաբաթը մեկ այդ ընկերությունների տնօրեններին հրավիրում ենք մեզ մոտ ու անընդհատ այդ հարցը հնչում է՝ ինչի՞ հիման վրա դուք որոշեցիք, որ հենց այսքան ջուր է ձեզ անհրաժեշտ»:
Վարդան Մելքոնյանն ասաց, որ երկու քրգործի հետ կապված դիմում է ներկայացրել դատախազություն:
Կարդացեք նաև
Հիշեցնենք նաեւ, որ վարչապետ Նիկոլ Փաշինյանը ԱԺ-ում հայտարարել էր. «Հլը մենք կգնանք էդ բոլոր ջրօգտագործող միություններում ստուգումներ կանենք, կտեսնենք ով ինչքան է գողացել եւ հետո չգաք՝ ասեք ջրօգտագործող միություններին լցնում եք բանտերը: Էս ի՞նչ սովորություն է՝ նստած իրենց տեղը գողանան, ուտեն, թալանեն, վերջում ասեն՝ աշխատավարձ չենք ստացել, կառավարություն, դե վճարի: Ինչի՞ պիտի վճարի կառավարությունը»:
Հռիփսիմե ՋԵԲԵՋՅԱՆ
