Այս պահին լարված իրավիճակ է ՀՀ Վերաքննիչ քրեական դատարանի դիմաց: Ռոբերտ Քոչարյանի աջակիցները փակել են դեպի դատարան մուտքի ճանապարհը: Այդ պատճառով քաշքշոց տեղի ունեցավ Ռոբերտ Քոչարյանի աջակիցների և մարտի 1-ի տուժողների ներկայացուցիչների՝ մի խումբ քաղաքացիների միջեւ:
Ոստիկանները փորձում են հանդարտեցնել դատարանի մոտ լարված իրավիճակը: Նրանք հորդորում են բացել ճանապարհը, բայց Քոչարյանի կողմնակիցները չեն ցանկանում դա անել:
Ոստիկանները, երբ հորդորեցին հեղափոխականների խմբին միանալ և կանգնել աջակիցների կողքին, մի կին ասաց. «Իրենք Քոչարյանի աջակիցներն են, մենք՝ ժողովուրդ»:
Նշենք, որ Վերաքննիչ քրեական դատարանում՝ նախագահությամբ Արմեն Դանիելյանի, քննարկվում են ՀՀ երկրորդ նախագահ Ռոբերտ Քոչարյանի, Սեյրան Օհանյանի, Յուրի Խաչատուրովի և Արմեն Գևորգյանի վերաբերյալ գործով Գլխավոր դատախազության ինչպես նաև տուժողների իրավահաջորդների ներկայացուցիչ Վահե Գրիգորյանի և տուժողի ներկայացուցիչ Սեդա Սաֆարյանի կողմից ներկայացված վերաքննիչ բողոքները:
Ոստիկանության ներկայացուցիչը, մեկնաբանելով դատարանի դիմաց իրավիճակը, լրագրողների հետ զրույցում ասաց. «Ժողովուրդն իրար չի հասկանում, պետք է ծառայություն կազմակերպենք, որ իրար հասկանան»:
Տաթև ՀԱՐՈՒԹՅՈՒՆՅԱՆ
