«Մենք քայլ առ քայլ գնում ենք դեպի բռնապետություն», «Հենարան» մամուլի ակումբում այսօր ասաց ՀՀԿ Կանանց խորհրդի նախագահ Կարինե Աճեմյանը:
Նա նշեց, որ դժվարանում է ասել, թե միանձնյա որոշումներ կայացնող մարդու՝ Նիկոլ Փաշինյանի քմահաճույքներն ուր կտանեն երկիրը:
Ըստ Կարինե Աճեմյանի՝ իրավիճակը բարդ է, քանի որ բազմաթիվ մարտահրավերներ ունենք. «Արցախն ի վերջո շատ դժվարին օրեր է ապրում այժմ այն պարզ պատճառով, որ մենք միասին չենք: Կա շատ մեծ ագրեսիա Արցախի ղեկավարության հանդեպ, ներսում այն մարդկանց հանդեպ, որոնք վաստակ են ունեցել և երկիրն առաջ տարել: Մարդիկ պետք է իրենց վերաբերմունքը ցույց տան»:
Այն, որ Նիկոլ Փաշինյանը պարբերաբար հիշում է ՀՀԿ-ին, Կարինե Աճեմյանն այսպես մեկնաբանեց. «Հիշում է ՀՀԿ-ին անընդհատ, դա այդպես էլ պիտի լինի: Արտաքին քաղաքականության մեջ որևէ նոր խոսք Նիկոլ Փաշինյանը դեռ չի ասել, ինչքան էլ ասում է՝ զրոյից եմ սկսել: Անցյալում շատ ծրագրեր դեռ շարունակվում են իրականացվել, իսկ այն, ինչ տեսնում ենք երկրում՝ տնտեսության անկում է, սոցիալական հարցերի ավելացումը: Այն բոլոր խնդիրները, որոնք ինքը պետք է լուծեր, խորանում են: Դա վատ կառավարման, չկարողանալու արդյունք է»:
Կարդացեք նաև
Դառնալով Աբովյանի ընտրություններին՝ Կարինե ԱՃեմյանն ասաց. «Այն զավեշտալի ձևակերպումները, որով հանդես եկավ մարզպետը, համարում եմ անթույլատրելի: Այս միջամտությունն իշխանություններն իրավունք չունեին անելու»:
Ըստ Կարինե Աճեմյանի՝ իրավիճակը, որին ականատես ենք լինում, երբ իշխանությունն իրեն ընդդիմադիր կեցվածքով է պահում, դա արդեն ոչ թե ծիծաղելի, այլ զավեշտալի է:
Տաթև ՀԱՐՈՒԹՅՈՒՆՅԱՆ
