«Իհարկե, մեր հարաբերություններում ամեն ինչ կարող է պատահել։ Մեր խնդիրն է այնպես անել, որ ընթացիկ ողբերգական իրադարձությունները չքաղաքականացվեն։ Չի կարելի թույլ տալ, որ դա վնաս հասցնի այն ամենին, ինչը միավորում է մեզ»,- այսօր հրավիրված մամուլի ասուլիսում ասաց ՀՀ-ում ՌԴ դեսպան Սերգեյ Կոպիրկինը`անդրադառնալով ռուս հատուկջոկատային Նիկիտա Բելյանկինի սպանությունը:
Հիշեցնենք, սպանության կասկածանքով ձերբակալվել են հայեր`Ռուսաստանի քաղաքացիներ Սերգեյ Խոջանյանը, Ռուդիկ Մանուկյանը, Արթուր Հակոբյանը, Դավիթ Եղիազարյանը, Սուրեն Մարկոսյանը, Հայաստանի քաղաքացիներ Նարեկ Ստեփանյանը, Համլետ Հայրապետյանը եւ Սահակ Սահակյանը, որոնց վերագրում են խուլիգանություն։ Նրանք մեղքը չեն ընդունում։
Լրագրողները հիշեցրել էին նաեւ Գյումրիում ռուս զինծառայողների կողմից բնակչության նկատմամբ տեղի ունեցող պարբերական ոտնձգությունները: Դեսպանն ասաց, որ ողբերգական միջադեպերը չեն կարող բացասական ազդեցություն ունենալ հայ–ռուսական հարաբերությունների մակարդակի վրա. «Ռուսական եւ հայկական ղեկավարություններն իրենց մեկնաբանություններում շատ զգուշավոր են այս հարցում: Այլ հարց է, որ մեր հարաբերություններն այնքան նշանակալի են, որ տարաբնույթ արձագանք են առաջացնում տարբեր ուժերի եւ պետությունների կողմից։ Նրանցից ոմանք փորձում են քաղաքական երանգ հաղորդել նման ողբերգություններին։ Բայց մեր երկրների ղեկավարությունների դիրքորոշումը շատ ամուր է նման քաղաքականացում թույլ չտալու հարցում»:
Դեսպանը հավաստիացնում է` ռուս հատուկջոկատայինի սպանության հարցով ամեն ինչ արվում է, որպեսզի քաղաքական արտահայտություններ եւ մեկնաբանություններ չլինեն։ Քննչական մարմիններն էլ ակտիվ աշխատում են եւ տեղեկացնում են իրենց աշխատանքի մասին։
Կարդացեք նաև
Նիկիտա Բելյանկինի սպանության գործով եւս երեք անձ է ձերբակալել. հայտնի չէ` նրանք հայե՞ր են, թե` ոչ:
Նելլի ԳՐԻԳՈՐՅԱՆ
