ԱՄՆ արդարադատության նախարարությունը դիմել է Մեծ Բրիտանիային Wikileaks կայքի հիմնադիր Ջուլիան Ասանժին արտահանձնելու խնդրանքով: Այս մասին հաղորդում է The Washington Post-ը՝ վկայակոչելով սեփական աղբյուրները: ԱՄՆ արդարադատության նախարարությունը պաշտոնապես չի հաստատել այդ տեղեկությունը:
Ըստ թերթի՝ հարցումն ուղարկվել է հունիսի 6-ին: ԱՄՆ-ի և Մեծ Բրիտանիայի միջև գործող պայմանագիրը ենթադրում է, որ արտահանձնման մասին հարցումը պետք է ուղարկել կասկածյալի ձերբակալությունից հետո՝ 60 օրվա ընթացքում:
ԱՄՆ-ում Ասանժին մեղադրանք է առաջադրված 18 կետով, այդ թվում լրտեսություն և դավադրություն՝ կառավարական համակարգիչները կոտրելու նպատակով: Wikileaks-ի հիմնադրին սպասվում է 175 տարվա ազատազրկում:
Ջուլիան Ասանժը ձերբակալվել էր ապրիլի 11-ին՝ ԱՄՆ-ի հարցման հիման վրա: Մինչ այդ պահը նա 7 տարի թաքնվում էր Լոնդոնում Էկվադորի դեսպանատանը: Մայիսի 1-ին Մեծ Բրիտանիայի դատարանը նրան դատապարտեց 50 շաբաթ ազատազրկման՝ գրավի դիմաց ազատ արձակվելու պայմանները խախտելու համար:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
