ԳԱԱ Պատմության ինստիտուտի տնօրեն Աշոտ Մելքոնյանին Թուրքիայից Ջավախք մտնելիս, Կարծախի անցակետում արգելել են մտնել Վրաստան: Aravot.am-ի հետ զրույցում պարոն Մելքոնյանն ասաց, որ նախկինում երբեւէ նման խնդիր չի ունեցել:
«Ես աշխարհի 40 երկրում եմ եղել, եւ ոչ մի երկիր ինձ վիզա չի մերժել, երբեք ինձ չեն արգելել»,-ասաց ԳԱԱ Պատմության ինստիտուտի տնօրենը:
Հարցինք` իր կարծիքով ինչո՞վ է պայմանավորված նման միջադեպը: «Չեմ կարող ոչինչ ասել, իրենք բացատրություն չեն տալիս: Ես միայն այն բանի հետ կապ ունեմ, որ վերջին շրջանում երկու ամիս շարունակ Ախալքալաքում եմ եղել շաբաթ-կիրակի օրերին, որովհետեւ եղբայրս ծանր հիվանդ էր, ես իրեն այցելելով գիտեի, որ այդ հիվանդությունը շատ վատ բանով է վերջանալու, ինչն այդպես էլ եղավ»,-պատասխանեց պարոն Մելքոնյանը:
Նաեւ հավելեց. «Եվ եթե դիվանագիտական խողովակներով միջամտություն չլիներ, ինձ թույլ չէին տալու, որ Վրաստանի տարածքով մտնեմ Հայաստան: Այլապես պետք է Կարծախի մաքսատնից վերադառնայի Կարս, այնտեղից կամ Ստամբուլի վրայով Երեւան գայի, կամ Կիեւի, Մոսկվայի վրայով` Անկարայից»:
Կարդացեք նաև
Գոհար ՀԱԿՈԲՅԱՆ
«Առավոտ» օրաթերթ
08․06․2019 թ․
