«Վրաստանի հետ շատ լավ հարաբերություններ ունենք, ինտեգրման տեսանկյունից նույնպես, հնարավորություն եղավ խոսել այդ մասին, երբ խոսում էինք Հայաստանի մասնակցության մասին «Մեկ գոտի, մեկ ճամփա» ծրագրին: Ենթադրում ենք, որ հնարավոր է իրականացնել այնպիսի ծրագիր, որը կփորձեր միացնել Սեւ ծովը Պարսից ծոցին:
Մենք այդ կապն իրականացնելու համար կառուցում ենք նաեւ Հյուսիս-Հարավ ճանապարհը, որը Հայաստանի հարավային սահմանային անցակետը կապելու է Հայաստանի հյուսիսում գտնվող վրաց-հայկական անցակետին: Հուսով ենք, որ այս ծրագիրը հետաքրքիր է Իրանի, Վրաստանի, Ռուսաստանի, Չինաստանի համար, այսօր խոսել ենք նաեւ Բուլղարիայի հետ, նրանք նույնպես հետաքրքրված են:
Հուսով եմ, որ սա իսկապես չափազանց կարեւոր ծրագիր է լինելու՝ մասնավորապես մեր տարածաշրջանի անվտանգության եւ կայունության համար»,- Սանկտ Պետերբուրգում կայացած ասուլիսում նշեց ՀՀ վարչապետ Նիկոլ Փաշինյանը:
Ինչ վերաբերում է Ադրբեջանին, այս մասին էլ Փաշինյանը նշեց. «Դժբախտաբար, Ադրբեջանի հետ նման կառուցողական հարաբերություններ չունենք, եւ այս պահին աշխատում ենք Լեռնային Ղարաբաղի հիմնահարցի կարգավորման ուղղությամբ: Հայաստանի որոշումը այս հարցում մնում է կառուցողականության դաշտում: Մենք կարծում ենք, որ հակամարտությունը պետք է կարգավորվի բացառապես խաղաղ ճանապարհով, բանակցությունների ճանապարհով:
Կարդացեք նաև
Բանակցություններն այս պահին ընթանում են ԵԱՀԿ Մինսկի խմբի համանախագահների ձեւաչափում: Կարեւոր է ընդգծել, որ այս ձեւաչափի մեկնարկի առաջին օրերից Լեռնային Ղարաբաղի ներկայացուցիչները ներկա են եղել, ներգրավված են եղել բանակցությունների գործընթացում:
Մեր դիրքորոշումն այնպիսին է՝ եթե մենք իսկապես ցանկանում ենք կարգավորել հակամարտությունը, ապա դա պարզապես հնարավոր չէ անել մի իրավիճակում, երբ Լեռնային Ղարաբաղը բանակցությունների գործընթացից դուրս է մնացել;
Անհրաժեշտ է վերականգնել լիարժեք, լիակազմ ձեւաչափը՝ ԵԱՀԿ Մինսկի խմբի նախագահության եւ ըստ միջազգայնորեն ընդունված փաստաթղթերի, այնտեղ կա բանակցությունների երեք կողմ՝ Հայաստան, Ադրբեջան եւ Լեռնային Ղարաբաղ: Այս պահին աշխատում ենք այդ ուղղությամբ, որ Լեռնային Ղարաբաղը, վերջապես, վերադառնա բանակցությունների սեղանին եւ ամբողջությամբ ներգրավի բանակցություններում»:
Գոհար ՀԱԿՈԲՅԱՆ
