Նոր Հարկային օրենսգրքի նախագծի քննարկումն ԱԺ-ում շարունակվում է:
«Լուսավոր Հայաստան» խմբակցության պատգամավոր Արկադի Խաչատրյանն իր ելույթում ասաց. «Նախագծի ընդունման դեպքում առաջիկա տարիներին տարեկան 4%-ով նախատեսված է բարձրացում ակցիզային հարկի մասով, մասնավորապես բենզինի, դիզվառելիքի, նավթամթերքի համար: Ակնհայտ է, որ վառելիքի թանկացումն իր հետ բերելու է նաեւ տրանսպորտային ծախսերի ավելացում, մեծանալու է տրանսպորտի ուղեվարձի բարձրացման հավանականությունը, բարձրանալու է գյուղտեխնիկայի շահագործման ծախսերը: Ի դեպ, գյուղատնտեսությունն էլ գերակա ուղղություն ենք սահմանել: Թանկանալու են ակցիզները նաեւ քսայուղերի համար: Տրանսպորտային ծախսերի ավելացումն իր հերթին շղթայական ձեւով բարձրացնելու է ապրանքների ինքնարժեքը ու բացասաբար է ազդելու տեղական արտադրանքի ինքնարժեքի վրա, ազդելու է հասարակության լայն շերտերի վրա»:
Խաչատրյանն ասաց, որ փոխանակ գինու ակցիզները պակասեցնենք, ընդհակառակը՝ ավելացնում ենք, այն դեպքում, երբ Վրաստանը չի կիրառում ակցիզային հարկ:
Պատգամավորը կառավարությանը կոչ արեց եկամտահարկի իջեցման ճեղքը փակել ստվերի կրճատմամբ: Նա հայտարարեց, որ այս Հարկային օրենսգիրքը բավարար հիմքեր չի ստեղծում տնտեսական հեղափոխության համար ու մեզ պետք է նոր Հարկային օրենսգիրք. «Ես անձամբ դեմ եմ քվեարկելու այս նախագծին»:
Կարդացեք նաև
Նույն խմբակցության պատգամավոր Մանե Թանդիլյանը նույնպես դժգոհեց, որ ակցիզային հարկերի առումով, այո, դարձնում են կանխատեսելի, բայց՝ կանխատեսելի վատ. «Մենք սպասում էինք, որ պետք է հուսադրող լիներ, մենք այս պարագայում ասում ենք, որ ձեր առօրյա կյանքը կանխատեսելի վատթարանալու է»: Նա հիշեցրեց, որ երբ վարչապետը խոսում էր միկրոբիզնեսի՝ հարկերից ազատման մասին, չէր ասում, որ խոսքը Երեւանից դուրս բիզնեսի մասին է. «Երեւանում գործող ձեռնարկություններին երբ հանում եք, սա, ըստ էության, անդրադառնում է շատ փոքր հատվածին ու ոչինչ չի փոխում: Այն սպասումը, որը ձեւավորել եք, նորից չեք արդարացրել»:
Թանդիլյանը նաեւ նշեց, որ ստվերի կրճատման հարցն էլ չեն դրել, հույսը միայն ՊԵԿ-ի վարչարարության վրա է, իսկ դա նշանակում է մահակի ուժով փոփոխություններ:
Հռիփսիմե ՋԵԲԵՋՅԱՆ
