«Ով ասել է՝ իրեն հարցրեք»,-ԱԺ-ում լրագրողների հետ զրույցում այսօր անդրադառնալով տեղեկություններին, թե ԲՀԿ առաջնորդը Մարտի մեկի գործով հարցաքննվել է Հատուկ քննչական ծառայությունում, ասաց Գագիկ Ծառուկյանը: Նա ոչ հերքեց, ոչ էլ հաստատեց տեղեկությունը՝ ասելով, որ դա գաղտնի է: Նա չասաց նաեւ, թե արդյոք Մարտի մեկի գործով որեւէ կարգավիճակ ունի. «Ես նման բանից տեղյակ չեմ, չեմ պատասխանի, գնացեք իրենց հարցրեք: Ոչ հաստատում եմ, ոչ բացառում»:
Գագիկ Ծառուկյանը շեշտեց՝ ուժի մեջ է իր այն հայտարարությունը, թե՝ «եթե ես կապ ունեմ Մարտի 1-ի հետ, ինձ հրապարակային գնդակահարեք»: Նկատառմանն ի պատասխան, որ ըստ քրեական գործի նյութերի՝ օլիգարխները զինված խմբավորումներ են ունեցել, եւ Ծառուկյանի անունը շրջանառվում է դրանց սննդի մատակարարման գործում, մասնավորապես՝ ըստ Մարտի մեկի գործով փաստահավաք խմբի նախկին անդամ Սեդա Սաֆարյանի՝ ԲՀԿ առաջնորդն ու Սամվել Ալեքսանյանն են սնունդ մատակարարել, Ծառուկյանն ասաց. «Եթե Մարտի մեկին իմ մասնակցությունը եղել է սննդով, նորից թող Ծառուկյանին գնդակահարեն: Լավ, այդքան ցեխ շպրտելը…»:
Գագիկ Ծառուկյանը վստահեցրեց, որ Մարտի մեկի հետ առնչություն չունի, իրեն այդ օրը հրավիրել են կառավարություն՝ իրավիճակը քննարկելու, բայց խառնաշփոթի մեջ որեւէ բան չարձանագրելով՝ ինքը հիասթափված հեռացել է կառավարությունից. «Երեսուն րոպե սպասել եմ եւ դուրս եկել, որեւէ մեկին չեմ տեսել, որեւէ քննարկում չի եղել»:
Կարդացեք նաև
https://www.facebook.com/aravot.am/videos/447421179162732/
Լուիզա ՍՈՒՔԻԱՍՅԱՆ
