Հունիսի 6-ին Կարելիայի Գերագույն դատարանը քննել է Պետրոզավոդսկի դատախազության դիմումը, որում վիճարկվում էր Հայաստանի ԴԱՀԿ նախկին ղեկավար Միհրան Պողոսյանի խափանման միջոցը տնային կալանքի փոխելու որոշումը:
Պողոսյանի փաստաբան Միխայիլ Յամչիցկին խնդրել է նիստն անցկացնել դռնփակ, քանի որ, նրա կարծիքով, Պողոսյանի և նրա ընտանիքի գտնվելու վայրի մասին տեղեկատվության հրապարակումը սպառնում է նրա անձնական անվտանգությանը:
Դատախազ Միխայլովան դեմ է արտահայտվել դռնփակ ռեժիմին, բացառությամբ այն տեղեկատվության, որը վերաբերում է Պողոսյանի անձնական կյանքին և առողջությանը: Ըստ դատախազի՝ Պողոսյանի երկու անչափահաս երեխաներն ապրում են Հայաստանում, ինչը ստիպում է կասկածել, որ նրա ընտանիքին սպառնացող վտանգ կա:
Դատավոր Ելենա Վլասյուկը մասամբ փակել է դատավարությունն այն պահին, երբ փաստաբանը որոշակի տեղեկատվություն էր փոխանցում Պողոսյանի անձնական կյանքի մասին:
Կարդացեք նաև
Դատախազը նշել է, որ Պողոսյանը պետք է մնա կալանքի տակ, քանի որ որոշվում է նրան Հայաստանին արտահանձնելու հարցը, իսկ Հայաստանում նա մեղադրվում է ծանր քրեական հանցագործության մեջ, հետևաբար կարող է թաքնվել:
Իր հերթին փաստաբանը նշել է, որ իր պաշտպանյալը որոշում է ընդունել մնալ Ռուսաստանում: Նա երկրորդ կրթությունը ստացել է Ռուսաստանում, տնտեսական գիտությունների թեկնածու է, նրա անչափահաս որդին ապրում է Ռուսաստանում: Բացի այդ, փաստաբանի խոսքով, մեկուսարանից դուրս գալուց հետո Պողոսյանը որոշ ժամանակ անձնագիր է ունեցել, հետևաբար նաև՝ իրական հնարավորություն թաքնվելու: Ըստ փաստաբանի՝ եթե նա ուզենար թաքնվել, ապա դրա հնարավորությունը նա ուներ: Այժմ Պողոսյանն արդեն անձնագիրը հանձնել է:
Ինքը՝ Պողոսյանը, շատ չի խոսել, միայն ասել է, որ այս ամբողջ պատմությունը կապված է «քաղաքական տարաձայնությունների» հետ:
Նիստի ընթացքում պարզվել է, որ Պողոսյանի համար բնակարան է վարձակալել կոմերցիոն մի ընկերություն, իսկ վճարումը կատարում է դրա տնօրենը:
Կարճ խորհրդակցությունից հետո դատարանն անփոփոխ է թողել նրան տնային կալանքում պահելու որոշումը:
Պատրաստեց՝ Վիկտորյա ԱՆԴՐԵԱՍՅԱՆԸ
