2018թ.-ի պետբյուջեի կատարողականի ներկայացման ժամանակ այսօր ԱԺ-ում ԲՀԿ պատգամավոր Սերգեյ Բագրատյանը Պետեկամուտների կոմիտեի նախագահ Դավիթ Անանյանից հետաքրքրվեց՝ առաջիկայում որոշ ակտերի առնչությամբ հարկային համաներում սպասվո՞ւմ է: ՊԵԿ նախագահը նախ շեշտեց, որ հարկային համաներումը լավ գործիք չէ, քանի որ հարկ վճարողների մոտ սպասումներ է առաջացնում. «Հարկային կարգապահության տեսանկյունից նրանք կարող են ավելի ոչ օրինապահ վարքագիծ դրսեւորել՝ ակնկալելով, որ առաջիկայում ունենալու են համաներում: Կարծում եմ՝ ոչ, չենք կիրառի համաներում որոշ ակտերի վերաբերյալ, բայց համոզված եմ՝ դրանք պետք է հատ-հատ ուսումնասիրել»:
Դավիթ Անանյանի խոսքով՝ հարկային վարչարարության արդյունավետ տեսանկյունից այդ հարցում անելիք ունեն. «Բոլոր ակտերի պատմությունն ուսումնասիրելով՝ կարող ենք փաստել, թե որ ճանապարհով են հարկային պարտավորություններ առաջացել, եւ հարցի լուծման համար կարելի է ԱԺ-ում քննարկում ծավալել: Պետք է պարզել, թե որոնք են անհուսալի հարկային ակտերը եւ հասկանաք՝ ունե՞նք հարկային ակնկալիքներ: Եթե չունենք, դրանցից պետք է ազատվել»:
Լուիզա ՍՈՒՔԻԱՍՅԱՆ
