Այն բանից հետո, երբ ՀԱԿ ակտիվիստ Վարդան Հարությունյանը նախկին իշխանություններին ու ՀՅԴ-ականներին մեղադրեց իրեն ծեծելու համար, մի խումբ դաշնակցականներ ինքնաբուխ ակցիա կազմակերպեցին: «Ես եմ ծեծել» կարգախոսով նրանք ներկայացել էին ոստիկանական բաժանմունքներ ու մեղքն իրենց վրա վերցրել: Հանրային հնչեղություն ստացած միջադեպին անդրադարձել է նաև վարչապետ Նիկոլ Փաշինյանն ու ասել, որ բռնությունից զերծ հանրության տեսլական պետք է ձևավորենք, իսկ Հայաստանում այսօր առկա բռնության քարոզը լուսանցքային, հետցնցումային երևույթ է: «Որևէ կասկած չկա, որ բռնություն քարոզող և բռնություն գործադրող ուժերն ու անձինք, անկախ հանգամանքից՝ իշխանության, թե ընդդիմության համակիրներն են, դուրս են մղվելու հանրային և քաղաքական կյանքից: Իհարկե, եթե դուրսմղման պրոցեսը տեղի կունենա հանրային պրոցեսների արդյունքում, դա այլ պատմություն է, իսկ եթե պետք է իրավապահ մարմիններն արձագանքեն դրան, բոլորովին այլ գործընթաց է: Բռնության որևէ դեպք, որևէ դրսևորում, որևէ քարոզ, ատելության որևէ դրսևորում ՀՀ-ում տեղ չունի և չպետք է ունենա: Կարծում եմ՝ այս առումով Հայաստանում կա հանրային կոնսենսուս, ու դա պետք է արտահայտվի պետական ինստիտուտների գործունեության մեջ»,- նշել է վարչապետը:
ՀՅԴ ԳՄ մեկ այլ անդամ՝ ԱՐԾՎԻԿ ՄԻՆԱՍՅԱՆԸ, ընդգծելով, որ հրապարակային սպառնալիքներ են հնչում Արցախյան ազատամարտի խորհրդանիշ Պարգև սրբազանի, Արցախի նախագահի, պատերազմում մարտնչած հայորդիների հասցեին, հավելում է, որ այդքանից հետո լսում ենք իշխանությունների ակնհայտ անտարբեր, փնթի, առանձին դեպքերում նաև հրահրող կոչերը, և բնական է, որ հասարակության մեջ լինելու են նաև ընդվզումներ: Մարդիկ, տեսնելով իշխանությունների անգործությունը, գնում են իրավունքի պաշտպանության ճանապարհով, ու այդ երևույթը կարող է շարունակական բնույթ կրել: «Պետք է ժամանակին կանխվեր այն այլանդակությունը, որ հնչում էր հրապարակայնորեն, բայց իշխանությունը քար լռությամբ հետևում է ու անգամ քաղաքական հայտարարությամբ հանդես չի գալիս՝ դատապարտելու իրենց արժանապատիվ քաղաքացի համարող, բայց իրականում ոչ մի արժեքային համակարգ չունեցող անձանց: Հակառակը` թույլատրում է, հիմնավորում, թե ժողովրդավարական ճանապարհով ենք գնում, և ամեն մեկն ինչ ուզենա, կարող է ասել: Այդ ամենի պատճառով է նաև, որ հրապարակային վիրավորանքն ու սպառնալիքը դառնում են առօրյա երևույթ, հետևաբար, պատասխանն էլ սա է լինելու: Կոչ եմ անում իշխանություններին` օր առաջ վերջ տալ այս վիճակին, դատապարտել և հետևողական լինել անհանդուրժողություն և թշնամանք սերմանող վարքագծի նկատմամբ, որն այսօր տիրում է մեր երկրում»,- նշում է Մինասյանը, հավաստիացնելով, որ 130 տարվա քաղաքական ուժը բռնության որևէ տեսակ հանդուրժել չի կարող՝ անկախ հանգամանքից, թե այն ում նկատմամբ է կիրառվում:
Սևակ ՎԱՐԴՈՒՄՅԱՆ
Հոդվածն ամբողջությամբ՝ «Իրատես» թերթի այսօրվա համարում:
