2 հատոր (1-ին`167 թերթ, 2-րդ`190 թերթ) քրեական գործ է կազմվել մի օծանելիքի գողության համար: Կոտայքի մարզի բնակիչ Անիկ անունով մեկի նկատմամբ վերջնական պատիժ է նշանակվել ազատազրկում` 6 ամիս ժամկետով:
Նրա նկատմամբ ընտրված խափանման միջոցը` ստորագրություն չհեռանալու մասին, թողնվել է անփոփոխ` մինչեւ դատավճռի օրինական ուժի մեջ մտնելը:
Իրեղեն ապացույց գինու դատարկ շիշը ոչնչացվել է, իսկ մասնակի օգտագործված անուշաբույր հեղուկը վերադարձվել է Համեստ անունով տուժողին: Գործը բողոքարկման փուլում է: Դատախազը պահանջում է նշանակված պատժին լրիվ կամ մասնակիորեն գումարել նախորդ դատավճռով նշանակված եւ պայմանականորեն չկիրառված 1 ամիս ժամկետով կալանքը:
Ըստ մեղադրանքի, Անիկը «ուրիշի գույքի բացահայտ հափշտակություն կատարելու դիտավորությամբ՝ 2017թ. նոյեմբերի 13-ին, ժամը 12.00-ի սահմաններում, մուտք է գործել տուժողին պատկանող` Կոտայքի մարզում գտնվող գյուղի տունը եւ խոհանոցի սառնարանի միջից բացահայտ հափշտակել մեկ շիշ գինի` բացված վիճակում, իսկ ննջասենյակից` մեկ հատ օգտագործված «Արմանդ բասիինբլու» տեսակի օծանելիք»: Ուշագրավ է, որ հեռանալիս տուժող տանտիրուհին տեսել է ամբաստանվողին, որի հագուստի տակից ընկել է գինու շիշը, սակայն իրեն չի կորցրել, կռացել վերցրել է, ու փախել:
Կարդացեք նաև
Դատարանում զղջացել է Անիկը, ըստ դատաբժշկական փորձաքննության, նրա մոտ ոչ սթափ վիճակ է արձանագրվել:
Պարզվել է, որ Անիկը 2015թ. նոյեմբերի 12-ից գտնվում է նարկոլոգիական կաբինետում դիսպանսեր հաշվառման մեջ, նրա մոտ ախտորոշվել է «հոգեկան եւ վարքային խանգարումներ ալկոհոլի գործածման հետեւանքով, կախվածության համախտանիշ»: Դատարանով նա ճանաչվել է սահմանափակ մեղսունակ: Այսինքն՝ հանցանքը կատարելու պահին էլ նա եղել է սահմանափակ մեղսունակ:
Երկհատորանոց գործի մեջ չկա գոնե մի տող, թե, ի վերջո, որքան վնաս է տվել տուժողին, որ գործը բերել-հասցրել են դատարան:
Ռ. Մ.
«Առավոտ» օրաթերթ,
04.06.2019
