Հայաստանի նոր կառավարությունը հակված է ղարաբաղյան հարցի խաղաղ կարգավորմանը և կառուցողական երկխոսության: Այս մասին ադրբեջանական «Թուրան» գործակալության հետ զրույցում հայտարարել է Եվրամիության Հարավային Կովկասի և Վրաստանի ճգնաժամի հարցերով հատուկ ներկայացուցիչ Տոյվո Կլաարը, որը եղել է Ադրբեջանում և հանդիպել այդ երկրի ղեկավարության հետ:
«Այդպիսին է մեր տպավորությունը ԱԳՆ ղեկավարի և Հայաստանի այլ առաջնորդների հետ մի շարք պաշտոնական և ոչ պաշտոնական հանդիպումների արդյունքում»,- ասել է Կլաարը:
Ինչ վերաբերում է հակամարտության վերջնական լուծմանը՝ ԵՄ պաշտոնյան դրա կարևոր նախապայման է համարում քաղաքական կամքի առկայությունը: «Որպեսզի բեկում տեղի ունենա, կողմերը պետք է դրսևորեն քաղաքական կամք: Դա մի բան է, որ չի կարող նրանց կողքից տրվել»,- ասել է դիվանագետը:
Կլաարը նաև նշել է, որ ԵՄ-ն բանակցությունների մասնակից չէ, բայց սատարում է ԵԱՀԿ Մինսկի խմբի ջանքերը:
Կարդացեք նաև
«Նախագահ Իլհամ Ալիևն ինձ տեղեկացրել է՝ ինչպես է ինքը գնահատում ներկայի իրավիճակը, ինչ մարտահրավերներ և ինչ հնարավորություններ կան: Այս ամսվա վերջին ես նախատեսում եմ այցելել Երևան և շարունակել քննարկումները Հայաստանի ղեկավարության հետ»,- ասել է ԵՄ հատուկ ներկայացուցիչը:
Կլաարը նշել է, որ Ալիևի հետ քննարկվել է նաև ըստ պայմանավորվածության մարդասիրական քայլերի իրականացման հարցը: «Մենք քննարկել ենք վստահության և փոխըմբռնման հաստատմանն ուղղված միջոցառումների հարցը: Ես հույս ունեմ, որ Բաքվում և Երևանում գիտակցում են այդ գործընթացի կարևորությունը, և ես խնդրել եմ նախագահին և ԱԳՆ ղեկավարին ասել՝ ինչպես կարող է այդ գործընթացին օգնել Եվրամիությունը»:
Հարցին, թե ինչպես կարող է ԵՄ-ն օգնել խաղաղության գործընթացին, ԵՄ ներկայացուցիչն ասել է, որ բազում տարիներ ԵՄ-ն միջոցներ է հատկացրել քաղաքացիական հասարակության զարգացմանը, ժողովրդին խաղաղության նախապատրաստելու նախագծերին: Նրա խոսքով՝ ԵՄ-ն երկու նախագիծ ունի Հայաստանի և Ադրբեջանի քաղհասարակության ներկայացուցիչների մակարդակով, որոնցից մեկը վերջերս տեղի է ունեցել Թբիլիսիում:
Պատրաստեց՝ Վիկտորյա ԱՆԴՐԵԱՍՅԱՆԸ
