«Պարոն Բաբաջանյան, շնորհակալ եմ, որ ընթերցել եք հոդվածներս, բայց այսօր եւ նախկինում ընդհանրապես կաշկանդված չեմ»,-ԱԺ ամբիոնից այսօր հայտարարեց «Իմ քայլը» խմբակցության պատգամավոր, տնտեսագետ Բաբկեն Թունյանը:
Հիշեցնենք՝ «Լուսավոր Հայաստանի» պատգամավոր Արման Բաբաջանյանը Թունյանին մեղադրել էր, որ որպես լրագրող՝ նախկինում քննադատում էր Կենտրոնական բանկի նախագահ Արթուր Ջավադյանին, իսկ հիմա կաշկանդված է:
«Լավ բանին ասում ենք՝ «լավ է», վատ բանին ասում ենք՝ «վատ է»: Այսօր էլ կհամոզվեք դրանում»,-վստահեցրեց Բաբկեն Թունյանը:
Ապա շեշտեց. «Արթուր Ջավադյանի փաստաբանի դերը չեմ ուզում ստանձնել, բայց նա նախկին իշխանության օրոք է պաշտոնը ստանձնել եւ զբաղեցրել: Ուրեմն, դա բավարար է, որպեսզի նրա ծառայությունից հրաժարվե՞ք: Այդ դեպքում նայենք ձեր խմբակցության պատգամավոր Արկադի Խաչատրյանին, որը եղել է նախագահի աշխատակազմի բարձրաստիճան պաշտոնյա, ԿԲ խորհրդի անդամ, ԿԲ նախագահի խորհրդական: Նույն տրամաբանությամբ՝ նա ձեր շարքերում չպետք է լիներ, բայց ուրախ եմ, որ ձեր շարքերում է»:
Կարդացեք նաև
Բաբկեն Թունյանը նաեւ համոզմունք հայտնեց՝ ճիշտ չէր լինի, եթե քաղաքական փոփոխությունների արդյունքում ապաքաղաքական համարվող Կենտրոնական բանկի նախագահն էլ փոխվեր:
Բաբկեն Թունյանի ելույթին արձագանքեց «Լուսավոր Հայաստանի» պատգամավոր Արմեն Եղիազարյանը. «Ժամանակին դուք ձեր կայքով գիշեր-ցերեկ գովաբանում էիք վարչապետ Կարեն Կարապետյանի ղեկավարումը»:
Լուիզա ՍՈՒՔԻԱՍՅԱՆ
