Ազգային ժողովն այսօր քննարկում է ՀՀ «Ջրային օրենսգրքում լրացում եւ փոփոխություն կատարելու մասին» օրինագիծն առաջին ընթերցմամբ ընդունելու հարցը:
ՀՀ Բնապահպանության նախարար Էրիկ Գրիգորյանը հայտարարեց, որ այս փոփոխությամբ փորձ է արվում կարգավորել փոքր հիդրոէլեկտրակայաններին ջրօգտագործման թույլտվության տրամադրման գործընթացը: «Օրինագծով առաջարկվում է որոշակի գետերում արգելել ջրօգտագործման թույլտվության տրամադրումը՝ ՀԷԿ-եր կառուցելու նպատակով: Դրանք այն գետերն են, որոնցում առկա են էնդեմիկ եւ «Կարմիր գրքում» գրանցված ձկնատեսակների ձվադրման վայրերը, ջրաչափական դիտակետերը: Խոսքը նաեւ բնության հատուկ պահպանվող տարածքներում գտնվող գետահատվածների կամ գետերի մասին է: Սողանքային հատվածներում եւս կարգելվի նշյալ գործընթացը»,-տեղեկացրեց նախարարը:
Նա շեշտեց, որ օրինագիծը վերաբերում է միայն նոր կառուցվող ՀԷԿ-երին. «Իսկ գործողները կշարունակեն աշխատել իրենց տրամադրված արտոնագրի ժամկետներում»:
Հավելենք, որ ԱԺ-ն դեռ պետք է քվեարկի օրինագիծը:
Կարդացեք նաև
Լուիզա ՍՈՒՔԻԱՍՅԱՆ
