Հայաստանի լավագույն հեծանվորդ, մինչեւ 23 տարեկանների Եվրոպայի չեմպիոն Էդգար Ստեփանյանը Մոսկվայում մասնակցել է «Գրան Պրի» մրցաշարի հերթական փուլին: Էդգարի անձնական մարզիչ, Հայաստանի ազգային հավաքականի գլխավոր մարզիչ Արմեն Գյոզալյանը մրցավայրից Aravot.am-ին տեղեկացրեց, որ իր սանը շատ լավ էր մեկնարկել օմնիումում եւ ամեն բան նորմալ էր մինչեւ չորրորդ՝ խմբակային վազքը, որտեղ մի քանի հեծանվորդ ընկել է, նրանց հետ՝ Էդգարը եւ ձեռքը ցավեցրել է:
«Ձեռքը ֆիքսել ենք ու գնալու ենք Սանկտ-Պետերբուրգի «Գրան Պրի»: Էդգարը հիմա հեծանվի ղեկը բռնել չի կարողանում: Հաջորդ մեկնարկին երեք օր դեռ կա: Ամեն բան անում ենք, որ ցավն անցնի եւ Էդգարը ելնի մեկնարկի: Հույս ունենք, որ ամեն բան լավ կլինի, մանավանդ, որ Էդգարը պայքարող ու մարտնչող տեսակ է:», – ասաց Արմեն Գյոզալյանը:
Աշոտ ՀԱԿՈԲՅԱՆ
