Հունիսի 3-ին, ժամը 11:50-ին «911» ծառայությանն ահազանգ է ստացվել, որ Երևան քաղաքի Բագրևանդի 5 հասցեում քաղաքացին սպառնում է ինքնահրկիզվել: Անհրաժեշտ է փրկարարների օգնությունը: Հայտնում է Արտակարգ իրավիճակների նախարարությունը:
«Դեպքի վայր է մեկնել ԱԻՆ ՓԾ հրշեջ-փրկարարական ջոկատից մեկ մարտական հաշվարկ:
Փաստաբանական ծառայության աշխատակցի կողմից իրականացված բանակցությունների արդյունքում հաջողվել է կանխել դեռևս անձը չպարզված քաղաքացու ինքնահրկիզման փորձը:
Փրկարարները դեպքի վայրում իրականացրել են հերթապահություն»:
Կարդացեք նաև
Հիշեցնենք՝ փաստաբան Նորայր Նորիկյանը հունիսի 1-ին գրել էր. «Երեկ ուշ երեկոյան ընկերս ինձ հայտնեց, որ ԶՈՒ նախկին զինծառայողներից մեկը հայտարարություն է տարածել այն մասին, որ ս.թ. հունիսի 3-ին պաշտպանության նախարարության դիմաց ինքնահրկիզվելու է:
Հայտարարության բովանդակությունից պարզ է դառնում, որ նախկին զինծառայողի խնդիրը վերաբերում է նրա բնակարանային անմխիթար պայմաններին:
5 երեխա ունեցող նախկին զինվորականին պաշտպանության նախարար Դավիթ Տոնոյանն անձամբ է խոստացել հնարավորինս արագ լուծել հարցը:
Քիչ առաջ խոսեցի այդ անձի հետ՝ հորդորելով չգնալ այդպիսի ծայրահեղ քայլի:
Վերջինս հայտնեց, որ հավատում է Դավիթ Տոնոյանի խոսքին, սակայն պնդում է, որ նախարարության ստորին օղակներում ոչ մի քայլ չեն անում՝ իր խնդիրը լուծելու համար: Եվ իր ճարահատ քայլը մտված է իր խնդիրը լուծելուն, քանի որ շուրջ 20 տարի բնակվում է անգամ տարրական պայմաններ չունեցող տարածքում:
Հրավիրում եմ իրավասու մարմինների, մասնավորապես՝ պաշտպանության և արտակարգ իրավիճակների նախարարության, ինչպես նաև ոստիկանության ուշադրությունը՝ ստեղծված խնդիրը լուծելու համար՝ խուսափելու անցանկալի և ողբերգական զարգացումներից:
Միաժամանակ հորդորում եմ պաշտպանության նախարարությանը՝ հնարավորինս արագ կատարել նախարարի հանձնարարությունը՝ նախկին զինծառայողի բնակարանի հարցը լուծելու համար»:
