ԱԺ-ն այսօր քննարկում է «Գրավատների մասին» եւ հարակից մի շարք օրենքներում փոփոխությունների օրինագիծը, որը սահմանափակումներ է ամրագրում քրեական հետապնդման ենթարկված անձանց համար: Ներկայացնելով նախագիծը՝ ՀՀ Կենտրոնական բանկի նախագահի Ներսես Երիցյանը (լուսանկարում) տեղեկացրեց՝ քրեական անցյալ ունեցող, դատապարտված եղած կամ քրեական հետապնդման ենթարկվող անձինք չեն կարող 10% եւ ավելի մասնաբաժին (բաժնետոմս) ունենալ ֆինանսավարկային կազմակերպություններում եւ ապահովագրական այն հաստատություններում, որոնք արտոնագիր ունեն ԿԲ-ի կողմից: Ըստ ԿԲ փոխնախագահի՝ այս սահմանափակումը ՀՀ-ի ստանձնած՝ փողերի լվացման եւ ահաբեկչության դեմ պայքարի միջազգային պարտավորությունների շրջանակում է:
Պատգամավորներից մեկը ցանկացավ հստակեցնել՝ «այսինքն, մինչեւ 10% մասնաբաժին կարո՞ղ են ունենալ»: Ներսես Երիցյանը պատասխանեց. «Ոչ, առհասարակ չեն կարող ստանալ, բայց քանի որ 10% եւ ավելին համարվում է «նշանակալի մասնաբաժին», օրենքով պետք է ամրագրել, որ դա էլ է արգելվում, որովհետեւ սա միջազգային պարտավորության պահանջ է: Այդպիսի անձինք չեն կարող նաեւ արտոնագիր ստանալ: Ֆինանսական ինստիտուտներում նման անձինք այժմ չկան, բայց օրենքներում պետք է տրվի նշյալ սահմանումը, որպեսզի բավարարենք միջազգային չափանիշներին»:
Հավելենք, որ օրինագիծը դեռ պետք է քվեարկվի խորհրդարանում:
Լուիզա ՍՈՒՔԻԱՍՅԱՆ
