Երեկ Շիրակի մարզի ընդհանուր իրավասության դատարանը որոշեց կալանավորել Գյումրու համայնքապետարանի աշխատակազմի անշարժ գույքի կառավարման բաժնի պետ Մանուկ Առաքելյանին և նույն բաժնի առաջատար մասնագետ Սլավիկ Ղազարյանին։ Նրանք կասկածվում են ապօրինի շինարարությունը չարձանագրելու դիմաց կաշառք վերցնելու ու դրան օժանդակելու համար։
Շիրակի մարզի դատախազ Կարեն Գաբրիելյանն Aravot.am-ին ասաց․ «Երեկ իմ հանձնարարությամբ վարույթն իրականացնող քննիչի և քրեական գործի նկատմամբ հսկողություն իրականացնող դատախազի կողմից շատ հիմնավոր, փաստարկված և պատճառաբանված միջնորդություններ են ներկայացվել Շիրակի մարզի ընդհանուր իրավասության դատարան՝ նշված անձանց նկատմամբ որպես խափանման միջոց կալանքը ընտրելու վերաբերյալ։ Եվ դատարանը, քննելով այն, բավարարել է ու այդ անձանց նկատմամբ որպես խափանման միջոց է կիրառվել կալանքը։
Ինչ վերաբերում է բաժնի պետին ձերբակալումից ազատելուն, դատարանը նրան ազատել է 01․06․2019 թվականին, սակայն մեկ օր անց, ինչպես նշեցի, նշված անձը վերցվել է կալանքի։ Ճիշտ է՝ բաժնի պետն արդեն իսկ գտնվում է կալանքի տակ, այդուհանդերձ նրա՝ ձերբակալումից ազատ արձակելու կապակցությամբ կայացված դատական ակտը մեր կողմից բողոքարկվելու է։
Մարզում ավելի ինտենսիվ կարգով շարունակվելու է պայքարը կոռուպցիոն հանցագործությունների դեմ և դրանցում ներգրավված անձանց նկատմամբ քրեաիրավական մեխանիզմները լինելու են ավելի խիստ, ինչի համատեքստում հաշվի առնելով գործի հանգամանքները՝ դատի են տրվելու»։
Կարդացեք նաև
Նունե ԱՐԵՎՇԱՏՅԱՆ
