ԵԱՀԿ Մինսկի խմբի համանախագահներն օրերս Ադրբեջան կատարած այցի ժամանակ հանդիպել են «Լեռնային Ղարաբաղի ադրբեջանական համայնքի» ներկայացուցիչների եւ ղեկավարի հետ: Ըստ «Օրբելի» կենտրոնի փորձագետ Տարոն Հովհաննիսյանի՝ սա աննախադեպ չէ, նախկինում էլ են համանախագահները հանդիպել նրանց հետ:
«Սյստեղ զարգացումն այն է, որ նախորդ տարի համայնքի ղեկավարն է փոխվել, իսկ նրան նախորդածը ոչնչով աչքի չէր ընկնում: Նոր ղեկավարը դիվանագետ է՝ Ադրբեջանի ԱԳ նախարարության նախկին աշխատակից, եւ այդ համայնքի աշխատանքը հիմա համակարգում է Ադրբեջանի ԱԳՆ-ն»,-«Պոստ սկրիպտում» մամուլի ակումբում լրագրողների հետ հանդիպմանն այսօր հայտարարեց Տարոն Հովհաննիսյանը:
Նրա բնորոշմամբ՝ երբ հայկական կողմը նշում է, որ Արցախը պետք է դառնա բանակցային սեղանի լիարժեք կողմ, Ադրբեջանն առաջ է քաշում «համայնքի» խնդիրը՝ փորձելով հավասար հարթության վրա դնել Արցախի ընտրված իշխանությանը եւ Ադրբեջանի հասարակական կազմակերպությանը. «Սա չի տեղավորվում տրամաբանության մեջ: ԵԱՀԿ ՄԽ հայտարարություններում քանիցս շեշտվել է, որ կողմերից մեկը ԼՂ ընտրված իշխանություններն են»:
Փորձագետը համոզված է, որ հայկական կողմն իր հերթին պետք է ակտիվ առաջ քաշի նախկին ԼՂԻՄ-ի բռնազավթված տարածքների հայերի իրավունքների հարցը. «Շահումյանի շրջանի մասին է խոսքը, որը բռնազավթվեց Ադրբեջանի կողմից, Մարաղա գյուղը՝ եւս: Տեղի բնակիչներն արտաքսվել են, սպանվել: Նրանք նույնքան իրավունք ունեն բարձրաձայնելու այդ մասին»:
Կարդացեք նաև
https://www.facebook.com/aravot.am/videos/382853059104985/
Լուիզա ՍՈՒՔԻԱՍՅԱՆ
