Լրագրողները ԱԺ փոխնախագահ Ալեն Սիմոնյանից հետաքրքրվեցին՝ ինչպես է վերաբերվում «Իրազեկ քաղաքացիների միավորում» ՀԿ-ի նախագահ Դանիել Իոաննիսյանի՝ իր կեղծ տվյալներով հայտարարագիր ներկայացնելու վերաբերյալ հայտարարությանը:
«Ինձ մոտ ժպիտ է առաջացնում, որ ինձ կարելի է մեղադրել հինգ միլիոն դրամ կամ տասը հազար դոլար հարստանալու մեջ, լուրջ չեմ վերաբերվում դրան: Դանիել Իոաննիսյանն էլ, որ այդ կայքի (FIP.am) սեփականատերն է կամ հիմնադիրը, իր մասին որեւէ բան չեմ ուզում ասել, որ ինքը հետո չգնա դրա հաշվին ինչ-որ տեղերից գումար ուզի, ասի ՀՀ ԱԺ փոխխոսնակն իրեն ճնշումների է ենթարկում»,-ասաց Ալեն Սիմոնյանը:
Նա չբացառեց, որ գուցե դատի տա իր խոսքերով սուտ տեղեկություններ տարածելու համար:
Ինչ վերաբերում է իր մեքենային, որն ըստ Իոաննիսյանի հրապարակած տվյալների, ձեռք էր բերվել պաշտոն ստանալուց հետո, ԱԺ փոխխոսնակն ասաց, որ մեքենան գրանցվել է մի քանի օրվա տարբերությամբ։ «Ես հասկանում եմ, որ մեքենա ունենալը ոմանց կյանքում իրադարձություն է, ես 1996 թվականից մեքենաներ եմ ունեցել, եւ ամեն երկու-երեք տարին մեկ նորացրել եմ։ Ես շատ բաց եմ, բոլորը գիտեն իմ մասին, դրա համար չեմ էլ ուզում խոսել»,-ասաց նա։
Կարդացեք նաև
Նաեւ հավելեց, որ գուցե դատի չտա, որովհետեւ, իր խոսքերով, իշխանության հետ դատական վեճի մեջ մտնելը գրանտի հնարավորություն կընձեռի: «Մարդիկ շատ գիտեն, թե ինչեր եմ ունեցել, ով եմ, Դանիելի վարկանիշը իմ վարկանիշի հաշվին չեմ ավելացնի»,-ասաց Սիմոնյանը:
Գոհար ՀԱԿՈԲՅԱՆ
