«90-ականներին, երբ մարդիկ գնում էին պարկով ալյուր եւ շաքարավազ, տանը պահում էին, ինչպես բոլորը, այդ թվում նաեւ իմ ընտանիքն էր դա անում, պատմում են, որ ես մի անգամ, օգտվելով նրանից, որ տանը ոչ ոք չի եղել, հորաքրոջս տղայի գլխին եմ լցրել պարկով շաքարավազն ու ալյուրը եւ փորձել եմ խաղ կազմակերպել»,- Aravot.am-ի հետ զրույցում իր մանկության հիշողություններով կիսվեց «Լուսավոր Հայաստան» խմբակցության պատգամավոր Անի Սամսոնյանը:
Հարցրեցինք՝ դրանից հետո տնեցիք եկել են, տեսել են, ծեծե՞լ են, թե՞ չէ՝ Սամսոնյանը պատասխանեց. «Չեմ հիշում, բայց ասում են, շատ բարկացել են: Հիշում եմ այն վայրը, որտեղ դա եղել է՝ մեր բալկոնը: Ընդհանրապես ասում են, որ ես չար երեխա եմ եղել, պատմում են, որ երբ փոքր ժամանակ հիվանդացել եմ, պառկել եմ հիվանդանոցում, շատ չար եմ ինձ պահել, չեմ ենթարկվել բժիշկներին»:
Թե ի՞նչ երազանքներ է ունեցել փոքր ժամանակ, պատգամավո՞ր է երազել դառնալ՝ նա պատասխանեց. «Շատ տարբեր երազանքներ եմ ունեցել: Ամեն անգամ ինչ-որ գեղարվեստական գիրք կարդալիս ինձ մոտ երազանքներ էին ծնվում: Օրինակ, մի պահ շատ խորացած էի ամերիկյան արկածային գրականության ուղղությամբ եւ կարդում էի տարատեսակ ֆերմերների մասին գրքեր ու ինչ-որ երազանքներ էին ծնվում, որ ես կարող եմ ունենալ ֆերմա, պահեմ կենդանիներ, ցանեմ մշակաբույսեր: Հետո երազել եմ ունենալ դպրոց»:
Հիշեցնենք, որ վաղը Երեխաների պաշտպանության օրն է եւ երեխաների համար ոչ միայն բաց են լինելու ԱԺ-ի դռները, այլեւ փակվելու է Բաղրամյան պողոտան:
Կարդացեք նաև
Հռիփսիմե ՋԵԲԵՋՅԱՆ
