ԱԺ-ն այսօր քննարկում է «Պետական տուրքի մասին» օրենքում լրացումներ կատարելու օրինագիծը, որը, հիշեցնենք, ներմուծված ցեմենտի մեկ տոննայի համար սահմանում է ժամանակավոր պետտուրք՝ 22 000 դրամի չափով: ՀՀ Տնտեսական զարգացման եւ ներդրումների նախարար Տիգրան Խաչատրյանը հայտարարեց, որ շահագրգիռ կողմերի հետ եւ Տնտեսական հարցերի հանձնաժողովում քննարկումների արդյունքում նախագծում փոփոխություն են կատարել՝ 22 000 դրամի փոխարեն սահմանելով 14 000 դրամ:
«Սա պայմանավորված է նրանով, որպեսզի ներմուծվող ցեմենտն իսպառ չվերանա հայկական շուկայից, այլ մրցակցություն լինի տեղական եւ ներմուծված ապրանքի միջեւ»,-իրավիճակն այսպես բացատրեց Տնտեսական հարցերի հանձնաժողովի անդամ, «Իմ քայլը» խմբակցության պատգամավոր Հայկ Սարգսյանը:
«Լուսավոր Հայաստանի» պատգամավոր Մանե Թանդիլյանին օրինագծի վերջնական տեսքը չգոհացրեց. «Մրցակցությունը խաթարեցիք, փոխանակ տեղական արտադրողին արտոնություն տայիք»:
Կարդացեք նաև
Տիգրան Խաչատրյանը պատասխանեց. «Բոլոր դիտարկումները հաշվի ենք առել, ճշտումներ ենք արել: Դա այն ճիշտ չափն է, որը ներմուծողին եւ տեղական արտադրողին բերում են նույն մակարդակի վրա: Ցավոք, սա այն դեպքն է, երբ արտոնության միջոցով չէինք կարող բարելավել տեղական արտադրողի պայմանները»,-փոփոխությունն այսպես պարզաբանեց ՀՀ Տնտեսական զարգացման եւ ներդրումների նախարար Տիգրան Խաչատրյանը:
Հավելենք, որ ԱԺ-ն դեռ պետք է քվեարկի օրինագիծը:
Լուիզա ՍՈՒՔԻԱՍՅԱՆ
