Հյուսիս-հարավ ավտոմայրուղու Աշտարակ-Թալին հատվածն արդեն բաց է:
Այսօր վաղ առավոտից Հյուսիս–հարավ» ավտոմայրուղու շինարարությամբ զբաղվող տասնյակից ավելի ընկերությունների աշխատակիցները փակել էին ճանապարհը եւ պահանջում էին վճարել իրենց աշխատավարձերը:
Աշխատավարձի պարտքը «Կորսան Կորվիամ Կոնստրուկսյոն Էս» ընկերությանն է, որը, ինչպես աշխատակիցներն են պնդում, լքել է Հայաստանը, իսկ ՀՀ կառավարությունում տարբեր կառույցներ խնդրի լուծումն իրար վրա են գցում: Ճանապարհ փակած անձինք պնդում են, որ 800 աշխատակիցների աշխատավարձ չի վճարվել:
«Կորսան Կորվիամ Կոնստրուկսյոն Էս» ընկերությունը «Հյուսիս–հարավ» տրանսպորտային միջանցքի կառուցման առաջին եւ երկրորդ տրանշերի իրականացման կապալառուն է: Տրանսպորտի, կապի եւ տեղեկատվական տեխնոլոգիաների նախարար Հակոբ Արշակյանն մարտ ամսին ասել է՝ ավտոճանապարհի շինարարական աշխատանքներն իրականացնող 17 կապալառու ընկերություններ 1.5 մլրդ դրամից ավելի գումար չեն ստացել իսպանական ընկերությունից:
Կարդացեք նաև
Աշխատակիցներն ասում են՝ ճանապարհը բացել են փոխվարչապետ Տիգրան Ավինյանի հետ պայմանավորվելուց հետո. վաղն առավոտյան ժամը 10:00-ին աշխատակիցների հետ պետք է հանդիպի Ավինյանի գրասենյակի ղեկավարը՝ Վարագ Սիսեռյանը:
Ճանապարհը փակած աշխատակիցները վստահեցնում են՝ եթե իրենց խնդիրը չլուծվի՝ կրկին կփակեն ճանապարհը:
Դեկտեմբերից ճանապարհի շինարարությունը դադարեցվել է։
Հիշեցնենք, որ Հյուսիս-հարավ ճանապարհային միջանցքի ծրագրում հարկային պարտավորություններից խուսափելու առնչությամբ քրեական գործ է հարուցված:
Օրերս էլ փոխվարչապետ Տիգրան Ավինյանն ասել է, որ «Հյուսիս–հարավ» ավտոճանապարհահատվածի շինարարության ենթակապալառուներին աշխատավարձերի չվճարման պատասխանատուն իսպանական կապալառուն է, տրանսպորտի, կապի եւ տեղեկատվական տեխնոլոգիաների նախարարությունը ենթակապալառուների նկատմամբ պարտավորություններ չունի։
Նելլի ԲԱԲԱՅԱՆ
