Ինչպես արդեն տեղեկացրել ենք, ԵՊՀ-ում հոգաբարձուների խորհրդի նիստի ժամանակ խորհրդի անդամ, իրավաբանական գիտությունների դոկտոր, պրոֆեսոր, Արթուր Վաղարշյանն առաջարկեց բուհի ռեկտորի ժամանակավոր պաշտոնակատարի ընտրությունը կատարել փակ քվեարկությամբ, քանի որ հետապնդումներ են լինում, եթե մարդիկ աշխատում են իրար հետ, ապա բաց քվեարկության դեպքում հետագայում կարող են խնդիրներ առաջանալ:
ԵՊՀ հոգաբարձուների խորհրդի նախագահ Գևորգ Մուրադյանը ի պատասխան վստահեցրեց՝ ինքն անձամբ է երաշխավորում, որ նման հետապնդումներ լինել չեն կարող: Այս առիթով Արթուր Վաղարշյանը հիշեցրեց, թե ինչպես մայիսի 29-ին չընտրվեց ՍԴ անդամի պաշտոնում ու մի դրվագ պատմեց. «Դուք ասում եք հետապնդումներ չեն լինի, բայց երեկ իմ՝ ԱԺ ելույթում ինձ հիշեցրին, թե Դուք ժամանակին տապալեցիք ԵՊՀ հոգաբարձուների խորհրդի նիստը: Հետևից մեկն էլ ասաց՝ հեսա մենք էլ կտապալենք Ձեր ընտրությունը»:
Նշենք՝ այսօր Արթուր Վաղարշյանը ֆեյսբուքյան գրառում էր կատարել և ամփոփելով իր ընտրության գործընթացը, գրել էր. «Ինձ թվաց, թե անցել եմ խաչաձև հարցաքննություն իտալական կաթոլիկ եկեղեցու ինկվիզիցիոն դատարանով, որում ինձ մեղադրում էին «Հայաստանի Հանրապետության սահմանադրական կարգերի գիտական տապալման», «Գ․ Հարությունյանի և Հ․ Թովմասյանի՝ նախկին իշխանությունների օրոք հենց այդ իշխանությունների հասցեին ուղղված քննադատության» համար»:
Տաթև ՀԱՐՈՒԹՅՈՒՆՅԱՆ
