«Նախագահն իրավասություն ունի առաջադրել թեկնածու, ԱԺ-ն իրավասություն ունի ընտրել կամ չընտրել այդ թեկնածուին: Այս գործընթացը պետք է շարունակվի այնքան, մինչեւ ԱԺ-ի ու նախագահի պատկերացումները համընկնեն», – այսօր ԱԺ նախագահ Արարատ Միրզոյանը լրագրողների հետ զրույցում այսպես պատասխանեց, թե ինչպե՞ս է բացատրում այն, որ այս էլ որերորդ անգամ ՍԴ անդամի թեկնածուին ԱԺ-ն մերժում է:
Նա հորդորեց սա որեւէ երպ չմեկնաբանել՝ իբրեւ նախագահի անձի կամ ինստիտուտի նկատմամբ հարգանքի դրսեւորման կամ դրա բացակայության նշան:
Հարցին՝ հնարավո՞ր է հանդիպեք նախագահին ու համաձայնության գաք մի թեկնածուի շուրջ, թե չէ այսպես ինչքա՞ն պիտի շարունակվի՝ Միրզոյանը պատասխանեց, որ նախագահի հետ պարբերաբար հանդիպում է եւ տարբեր հարցերի շուրջ խոսում է. «Թեկնածու առաջադրելու իրավասությունը նախագահինն է եւ նախագահն ունի իր պատկերացումները: Տեսնենք հաջորդն ով է»:
Դիտարկմանը, որ քննարկումներ կան, որ Արմեն Սարգսյանն իր փոքրաթիվ լիազորություններից օգտվելով՝ դեմարշ է անում ու տարբեր թեկնածուներ է առաջադրում, որոնց դուք դեմ եք՝ Միրզոյանը պատասխանեց. «Բոլորովին դեմարշի՝ իր կողմից մեր, մեր կողմից իր նկատմամբ չկա: ԱԺ-ն պիտի ընտրի կամ չընտրի այն թեկնածուին, որին հարմար կգտնի առաջադրել նախագահը»: Երբ լրագրողներն ասացին, որ նախագահի ինստիտուտին անվստահություն եք հայտնում՝ Արարատ Միրզոյանը չհամաձայնեց՝ ասելով. «Դուք քաղաքական հայտարարություն եք անում»:
Կարդացեք նաև
Հռիփսիմե ՋԵԲԵՋՅԱՆ
