Տրանսպորտի, կապի եւ ՏՏ փոխնախարար Բագրատ Բադալյանը կառավարության այսօրվա նիստից հետո խոսեց Հյուսիս-հարավ ավտոճանապարհի կառուցման կապալառու իսպանական «Կորսան Կորվիամ» ընկերության մասին՝ հայտնելով, որ ընկերությունն ունի ֆինանսական դժվարություններ եւ այժմ գտնվում է սնանկացման գործընթացում:
«Սնանկացված չէ, գտնվում է սնանկացման փուլում։ Այն սկսվել է երկու տարի առաջ, նոր չէ։ Անցած տարի իրենք որոշակի աշխատանքներ արել են, մենք վճարել ենք, այս պահի դրությամբ անհամաձայնությունը մի քանի կետով է, նաեւ ծավալներին է վերաբերում։ Անհամաձայնության կետը՝ դա ժամկետների երկարաձգումն է իրենց կողմից, մյուսը՝ Տրանշ 1-ով Երեւան-Արտաշատ եւ Երեւան-Աշտարակ հատվածների պահված գումարի հետվերադարձը և վերջին կատարողականի վճարումը»,- ասաց պարոն Բադալյանը:
Տրանշ 2-ի շինարարության ավարտը նախատեսված էր այս տարվա հուլիսին, եւ այս խնդիրների պատճառով չեն հասցնելու իրականացնել:
Փոխնախարարը նաեւ ասաց,որ սեպտեմբերին լրանում է վարկային համաձայնագրի ժամկետը. «Մենք նախատեսել ու ձեռնարկել ենք միջոցներ՝ վարկի ժամկետը երկարացնելու ուղղությամբ»:
Կարդացեք նաև
Այն հարցին էլ, թե շինարարությունը շարունակելու համար կառավարությունը նոր կապալառո՞ւ պետք է գտնի, փոխնախարարը պատասխանեց, որ դա կախված է իսպանական ընկերության հետ բանակցություններից. «Եթե դրանք կառուցողական ընթանան, գուցե կառավարությունը ցանկություն կունենա նրանց հետ շարունակելու աշխատանքները»:
Հիշեցնենք,որ այսօր «Հյուսիս-հարավ» մայրուղու շինարարությունն իրականացնող աշխատակիցները Արագածոտնի մարզի Ուջան գյուղի հատվածում փակել են ճանապարհը՝ պահանջելով չվճարված աշխատավարձերը: Ըստ բողոքի ցույցի մասնակիցների իրենք չեն վարձատրվել 2018 թվականի սեպտեմբերից:
Պարոն Բադալյանն այս առնչությամբ ասաց, որ ենթակապալառուները չեն վճարվել հիմնական կապալառուի կողմից, աշխատակիցներն էլ չեն վճարվել գործատուների կողմից. «Հիմնական կապալառուն ընկերությունն է, որը իրականացնում էր Տրանշ 2-ի հիմնանորոգման աշխատանքները: Աշխատանքները, սակայն, երկար ժամանակ է դադարեցված են, կա անհամաձայնություն նախարարության եւ կազմակերպության միջեւ։ Պետք է նշեմ, որ նախարարությունն իր պարտավորությունները կատարել է, բոլոր վճարումները իսպանական ընկերությանն արվել է, սակայն ընկերությունը չի վճարել իր ենթակապալառուներին»:
Լուսինե ԲՈՒԴԱՂՅԱՆ
